Тошкентда 2024 ва 2025-йиллар ноябр ойининг дастлабки ўн куни давомида ҳавонинг сифатига оид маълумотлар таҳлили давлат томонидан кўрилган чоралар самарасини қисман намоён қилмоқда. Ҳаво сифати индекси (AQI) ҳали ҳам баъзи кунларда хавфли даражага етган бўлса-да, ўртача кўрсаткичдан пасайиш кузатилган.
2024 йилнинг шу даврида AQI ўртача 119,8 бўлган бўлса, 2025 йилда бу кўрсаткич 109,9 га тушган. Аммо айрим кунларда, масалан, 2025 йилнинг 3 ноябрида AQI 176, 9 ноябрда эса 161 ни ташкил қилган.
Шу билан бирга, 4 ноябрда кўрсаткич 28 бўлиб, сўнгги йиллардаги энг яхши натижалардан бири қайд этилган. Куз-қиш мавсумида ҳаво ифлосланиши аҳоли ҳаёт сифати учун жиддий муаммо бўлиб қолмоқда.
Ҳукумат бу борада қатор қонунлар қабул қилиб, тизимли ечимларни амалга оширишга киришган. Хусусан, Тошкентда атмосфера ҳавосини яхшилашга йўналтирилган дастурлар ишлаб чиқилган.
Улар орасида "Евро-4" стандартидан паст бўлган ёқилғини босқичма-босқич тақиқлаш ҳамда нефтни қайта ишлаш заводларини модернизация қилиш кабилар мавжуд. Шунингдек, Тошкент ва унинг атрофида катта майдонларда "яшил зоналар" ташкил этилиши режалаштирилган.
2025 йил октябр ойида саноат корхоналари ва иссиқхоналардан чиқаётган чиқиндиларни камайтиришга қаратилган янги чора-тадбирлар тақдим этилган. Улар орасида замонавий чанг-газ тозалаш тизимларини ўрнатиш ҳам бор.
Тошкент ҳокимияти ҳуқуқни муҳофаза қилувчи органлар билан биргаликда экологик рейдлар ўтказиб, айниқса кўмир ёқадиган иссиқхона хўжаликларининг қонунбузарликларини аниқлашда фаолиятни кучайтирмоқда. Бу чора-тадбирлар мамлакатнинг миллий устувор йўналиши сифатида эълон қилинган "яшил иқтисодиёт" стратегияси доирасида амалга оширилмоқда.
Статистик яхшиланишларга қарамай, вазият мураккаблигича қолмоқда. Хусусан, PM2.5 каби майда заррачалар концентрацияси баъзи кунларда Жаҳон соғлиқни сақлаш ташкилоти тавсияларидан анча юқори бўлиб, бу тасдиқланган дастурларни изчил ва узоқ муддатли амалга ошириш заруратини кўрсатади.
