Президентнинг "Ички ишлар органларининг қўриқлаш соҳасидаги фаолиятини самарали ташкил этиш чора-тадбирлари тўғрисида"ги қарори қабул қилинди. Ушбу ҳужжат билан Миллий гвардиянинг Қўриқлаш бош бошқармаси Ички ишлар вазирлиги (ИИВ) ҳузуридаги Қўриқлаш департаменти этиб қайта ташкил этилди. Янги тузилма объектларни замонавий усулларда қўриқлаш, сунъий интеллект технологияларини жорий этиш орқали мамлакат хавфсизлигини мустаҳкамлашни кўзда тутади.
Сунъий идрок ва рақамли назорат
Департамент зиммасига шартнома асосида давлат аҳамиятига молик, ўта муҳим объектларни, таълим даргоҳларини, шунингдек, жисмоний ва юридик шахсларнинг мол-мулкини замонавий усуллар орқали қўриқлаш вазифаси юклатилди. Асосий эътибор қўриқлашга рақамли воситалар ва сунъий идрок технологияларини кенг жалб қилиш, қўриқланаётган объектларда ички тартиб ва назорат режимларини кучайтиришга қаратилади.
2026 йилдан мажбурий "Face ID"
Қарорда алоҳида қайд этилишича, 2026 йил 1 январдан эътиборан қўриқловга олинган банклар, йирик корхоналар ва маҳаллий ҳокимият биноларида кириш ва чиқиш жойларига шахсни аниқловчи, яъни юзни таниш тизимлари босқичма-босқич ўрнатилади. Бу чоралар қўриқлаш хизматлари самарадорлигини ва хавфсизлик даражасини оширишга қаратилган бўлиб, назоратни замонавий рақамли технологиялар асосида мустаҳкамлайди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
