Ўзбекистоннинг давлат қарзи кескин ошмоқда — 2025 йил 1 октябрга келиб умумий қарз 44 миллиард долларга етди. Бу бир йил ичида қарийб 4,9 миллиард долларлик ўсиш дегани. Қарзнинг ЯИМдаги улуши 32,3 фоизга чиққан, аҳоли жон бошига тўғри келадиган қарз эса 1154 долларни ташкил этмоқда.
Умумий қарзнинг 36,7 миллиарди — ташқи, 7,2 миллиарди — ички қарздир. Ташқи маблағларнинг 47 фоизи бюджетни қўллаб-қувватлашга, 16 фоизи энергетикага, қолган қисми эса қишлоқ хўжалиги, транспорт ва уй-жой коммунал соҳаларига йўналтирилган.
Ўзбекистоннинг асосий кредиторлари Жаҳон банки (8 млрд $) ва Осиё тараққиёт банки (7,5 млрд $) ҳисобланади. Ташқи қарзнинг 63 фоизи долларда, 12 фоизи сўмда, 8 фоизи еврода шакллантирилган.
Мутахассислар иқтисодиёт ўсиши ва инфратузилма лойиҳалари сабаб ташқи маблағларга эҳтиёж ортганини айтишмоқда. Шу билан бирга, давлат кафолатисиз олинган, лекин давлатга тегишли банк ва корхоналар зиммасига тушадиган “квази-давлат” қарзлари ҳам кўпаймоқда.
2025 йилнинг биринчи ярмида Ўзбекистоннинг умумий (давлат + хусусий) ташқи қарзи 72,2 миллиард долларга етгани қайд этилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
