Иқтисодиёт ва молия вазирлиги келаси йилги давлат бюджетига оид қонун лойиҳасини жамоатчиликка тақдим этди. Ҳужжатда 2026 йилда иш ҳақи, пенсия, стипендия ва нафақаларни ошириш учун давлат 6 трлн сўм ажратиши белгиланган. Бу сумма айрим хизмат турлари нархининг кўтарилиши ва янги иш ўринлари очилиши билан боғлиқ харажатларни ҳам қамраб олади.
Қонун лойиҳасида аҳоли реал даромадини сақлаш мақсадида маош ва пенсиялар инфляциядан юқори даражада ошириб борилиши режалаштирилган. Прогнозга кўра, 2026 йилда инфляция 7 фоиз атрофида шаклланади.
Вазирлик ҳисоб-китобларида маълум қилинишича, давлат хизматчилари иш ҳақи 1 фоизга оширилса, бюджетдан қўшимча 1,697 трлн сўм, пенсия 1 фоизга кўтарилса, 832 млрд сўм ажратилиши керак бўлади.
2026 йилда иш ҳақи ва ижтимоий солиқ харажатлари учун 172,8 трлн сўм йўналтириш режалаштирилган — бу жорий йилга нисбатан 18,5 трлн сўм кўп. Маошларга оид тўловлар умумий давлат бюджети харажатларининг 42,9 фоизини ташкил этади.
Кейинги йилда стипендиялар учун 2,2 трлн сўм, пенсиялар учун 86,1 трлн сўм, нафақалар учун эса 14 трлн сўмдан ортиқ маблағ ажратилади.
Аввал эълон қилинган Фискал стратегияда маош ва пенсиялар 2026 йилда камида 6–7 фоизга оширилиши таъкидланган эди.
Шу тариқа, давлат ижтимоий харажатларини кенгайтириш орқали аҳоли даромадини қўллаб-қувватлашни давом эттирмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
