Қишлоқ хўжалигида юқори самарадорликка эришишнинг асосий омилларидан бири — билимли ва замонавий тафаккурга эга агрономлар тайёрлашдир. Шу боисдан, мамлакатда ёш мутахассисларни қўллаб-қувватлашга қаратилган мутлақо янги тизим жорий этилмоқда. Унга мувофиқ, маҳоратли билим ва амалиётга эга ёш агрономлар учун 2 минг доллар миқдорида ойлик маош ҳамда қишлоқ хўжалигига ихтисослашган туманларда кафолатланган иш ўринлари яратилади.
Президент Шавкат Мирзиёев таъкидлаганидек, бу ташаббус аграр соҳада кадрлар сифати ва тажрибасини оширишга хизмат қилади. Айни пайтда Аграр университетнинг 180 нафар талабаси дуал таълим асосида етакчи фермер хўжаликлари ва илғор кластерларда амалиёт ўтказяпти. Уларни ўқитиб, амалиёт билан таништираётган фермер ва кластер раҳбарларига ҳар бир талаба учун 5 миллион сўм компенсация берилади, талабанинг ўзига эса ойига 1,5 миллион сўмлик стипендия тайинланади.
Ушбу дастурнинг энг муҳим жиҳати — тажриба орттирган ёш мутахассисларни 167 та аграр туманнинг кафолатли иш ўринларига йўналтиришдир. Улар фермер хўжаликларида замонавий агротехнологияларни жорий этиш, серҳосил навларни илгари суриш, сифатли уруғчиликни ривожлантириш ва харажатларни қисқартириш орқали ҳосилдорликни оширишга бевосита кўмаклашади.
Агрономлар учун 2 минг долларлик маош белгилаш эса ушбу соҳани ёшлар учун янада жозибадор касбга айлантириши шубҳасиз. Бу нафақат мутахассислик обрўсини юксалтиради, балки қишлоқ хўжалигида янги авлод профессионалларини шакллантиришга хизмат қилади.
Ёш кадрларни қўллаб-қувватлаш орқали юртимиз аграр соҳасида янги тўлқин, янги сифат ва янги ютуқлар юзага келиши кутилаяпти.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
