Қозоғистоннинг «QazaqGaz» давлат компанияси ва Ўзбекистоннинг «Ўзтрансгаз» корхонаси мамлакат ҳудуди орқали газ транзитини амалга ошириш бўйича расмий келишувга эришди. Бу ҳақда «QazaqGaz» матбуот хизмати маълум қилди. Ҳужжат икки томон ўртасидаги энергетик ҳамкорликни янги босқичга олиб чиқиши таъкидланмоқда.
Маълум қилинишича, шартномани Ўзбекистон томонидан «Ўзтрансгаз» бошқарув раиси вазифасини бажарувчи Асқар Исоқов, Қозоғистон томонидан эса «QazaqGaz» бошқарув раиси Алибек Жамауов имзолаган. Томонлар ушбу келишув газ етказиб бериш занжирида барқарорликни таъминлашга хизмат қилишини қайд этмоқда.
Расмий баёнотда таъкидланишича, шартноманинг имзоланиши газни узлуксиз ва ишончли тарзда ташиш бўйича аввал эришилган келишувларни мустаҳкамлайди. Шунингдек, у газ транспорти соҳасидаги ўзаро ҳамкорликни янада чуқурлаштириб, минтақавий энергетика инфратузилмасининг ишончлилигини оширишга хизмат қилади. Айниқса, куз-қиш мавсумини барқарор ўтказишда мазкур битим муҳим аҳамият касб этади.
Қозоғистон Энергетика вазири Ерлан Аккенженов ушбу шартнома мазмунига ойдинлик киритиб, гап Россия табиий газининг транзити ҳақида кетаётганини билдирди. Унинг сўзларига кўра, ҳозирги келишув мавжуд ҳажмларни сақлаб қолиш билан чекланиб қолмасдан, келажакда транзит имкониятларини кенгайтиришни ҳам назарда тутади.
«Бу Россия газининг транзити ҳисобланади. Умуман олганда, биз транзит ҳажмини йилига 8,4 миллиард куб метргача ошириш имкониятини кўриб чиқмоқдамиз», — деди вазир журналистлар билан учрашув чоғида.
Мутахассислар фикрича, мазкур келишув Ўзбекистон ва Қозоғистон ўртасидаги стратегик энергетик ҳамкорликни мустаҳкамлаш баробарида, бутун Марказий Осиё минтақасида газ таъминоти барқарорлигига ижобий таъсир кўрсатади. Шу орқали транзит йўлакларининг самарадорлиги ошади ва мавсумий хавфлар камаяди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
