Президент Шавкат Мирзиёевга 2026–2030 йилларга мўлжалланган, болаларни зўравонликнинг барча кўринишларидан асрашга қаратилган комплекс стратегия тақдим этилди. Ушбу ҳужжат болалар учун хавфсиз, соғлом ва зўравонликдан холи муҳит яратишни асосий мақсад қилиб олгани билан аҳамиятлидир.
Стратегия доирасида зўравонлик хавфи остида бўлган болаларни эрта аниқлаш, жабр кўрган ёки бундай ҳолатларга гувоҳ бўлган болаларга ҳар томонлама ёрдам кўрсатиш устувор вазифа сифатида белгиланган. Хусусан, болалар ва уларнинг оилаларига ижтимоий, психологик, таълимий ҳамда ҳуқуқий хизматларни тизимли равишда тақдим этиш режалаштирилган.
Ҳужжатда болалар билан ишлашда замонавий ижтимоий ёндашувга асосланган, кичик ҳажмли ва очиқ форматдаги марказларни ташкил этиш назарда тутилган. Бундай марказларда ҳар бир бола учун алоҳида индивидуал иш режаси шакллантирилиб, унинг таълим олиши, жамиятга мослашуви ва тўлақонли ривожланишига эътибор қаратилади.
Шунингдек, болаларнинг ҳуқуқий манфаатларини ҳимоя қилиш масаласига алоҳида урғу берилган. Процессуал жараёнларда болалар ҳуқуқларини кафолатлаш, болалар билан ишлайдиган мутахассисларни махсус тайёргарликдан ўтказиш ҳамда идоралараро ҳамкорликни кучайтириш стратегиянинг муҳим йўналишларидан ҳисобланади.
Стратегия ижтимоий хавф остидаги болаларни таълим билан қамраб олиш имкониятларини кенгайтириш, муқобил жойлаштириш механизмларини такомиллаштириш, касбга йўналтириш ва уларни жамият ҳаётига мослаштириш чораларини ҳам ўз ичига олган.
Оилалар билан ишлаш қисмида эса болага нисбатан зўравонлик хавфини камайтириш, ота-оналарни қўллаб-қувватлаш, психологик ва ижтимоий ёрдам хизматларини йўлга қўйиш вазифалари белгиланган.
Бундан ташқари, болаларни ижтимоий ҳимоя қилиш соҳасидаги барча маълумотларни ягона электрон платформада жамлаш, зўравонлик ҳолатлари бўйича ягона ҳисоб ва мониторинг тизимини жорий этиш ҳам стратегиянинг муҳим жиҳатларидан бири сифатида қайд этилган.
Президент Шавкат Мирзиёев белгиланган чора-тадбирларни амалга оширишда тизимли ва изчил ёндашувни таъминлаш, улар ижросини доимий назоратда ушлаш бўйича масъулларга аниқ топшириқлар берди. Бу эса келгуси йилларда болалар ҳуқуқи ва хавфсизлигини таъминлашда муҳим қадам бўлиши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
