12:59 / 02.01.2026

Ўзбекистон 2030 йилгача газ қазиб олишни ошира олмайди

SOVAZ порталида эʼлон қилинган “Ўзбекистон–2030” стратегиясининг янгиланган лойиҳаси энергетика секторига оид кўрсаткичларни кескин қайта кўриб чиқди. Ҳужжатда яқин беш йил учун табиий газ қазиб олиш бўйича давлат кутган натижалар анча пасайтирилгани қайд этилиб, аввалги баланд марралар амалда бекор бўлаётгани кўринади. Бу ҳақда upl.uz хабар беради.

Янги таҳрирда 2030 йил учун мақсад 38,7 млрд куб метр этиб белгиланган. Бу 2023 йил сентябрида тасдиқланган режадаги 62 млрд куб метрлик кўрсаткичдан кескин паст — яʼни режа 37 фоиздан кўпроққа қисқарган. Қизиғи, 2025 йилнинг 11 ойлик статистикаси 38,9 млрд куб метрни кўрсатиб, аллақачон 2030 йилга қўйилган “маррадан” ҳам юқорида турибди.

Стратегия 2026–2030 йилларда жами қазиб олинадиган газ ҳажми 186,8 млрд куб метр атрофида бўлишини тахмин қилмоқда. Йиллик кесим эса яқин муддатда пасайиш давом этишини англатади: 2026 йилда 37,9 млрд, 2027 йилда 35,6 млрд, 2028 йилда эса 33,4 млрд куб метргача тушиш эҳтимоли бор. Фақат 2029 йилда 23,3 фоизли сакраш билан 41,2 млрд куб метрга чиқиш прогноз қилинган, бироқ 2030 йилга бориб яна пасайиш кутилмоқда.

Қайта белгиланган вазифаларни бажариш масъулияти Энергетика вазирлиги ҳамда “Ўзбекнефтгаз” зиммасига юкланган. Таҳлилчилар сўнгги тўрт йилда соҳада қазиб олиш 21,7 фоизга қисқарганини эслатиб, бунинг ортида стратегик режалаштиришдаги тизимли хатолар ва қисқа муддатли муаммоларга берилиб кетиш омили турганини таъкидлашмоқда.

Ҳужжат кўрсаткичлари аввалроқ Энергетика вазири Журабек Мирзамахмудов билдирган оптимистик баёнотлар билан ҳам “тўқнаш” келмоқда: у ўтган йил декабр ўрталаридан пасайиш 2026 йилдаёқ тўхтатилишини айтганди. Асосий умид Қорақалпоғистондаги янги конларда ишларни кучайтиришга боғланган эди. Бироқ янги лойиҳа, янги қувватлар ҳисобига ҳам яқин йилларда умумий манзара салбийлигича қолишини кўрсатмоқда.

Сўнгги йилларда Ўзбекистон, илгари газ экспортида йирик ўйинчи бўлганига қарамай, ички талаб ошгани ва қудуқлардаги дебет пасайгани сабаб Россиядан “Марказий Осиё – Марказ” қувурлари орқали реверс режимида импорт қилишга мажбур бўлди. Бу минтақа энергетика сиёсатида янги бурилиш сифатида баҳоланмоқда.