2026 йил кириб келиши билан Ўзбекистонда экологик хавфсизлик ва барқарор ривожланиш давлат кун тартибининг энг асосий йўналишларидан бирига айланди. Президент администрацияси раҳбари Саида Мирзиёева Alter Ego лойиҳасига берган интервьюсида ислоҳотлар манзарасини таҳлил қилар экан, атроф-муҳитдаги реал ўзгаришлар жамият тафаккури ва бизнес маданияти тубдан янгиланмас экан, тез кўринмаслигини таъкидлади. Унинг айтишича, соғлиқни сақлаш, таълим ва экология бўйича ташаббуслар узоқ масофага мўлжалланган “марафон” бўлиб, натижа йиллар давомида тизимли меҳнат билан келади. Бу ҳақда upl.uz хабар беради.
Суҳбатнинг энг оғриқли нуқталаридан бири Тошкентдаги ҳаво сифати бўлди. Саида Мирзиёева ўтган йил охирида давлат раҳбари томонидан ифлосланишни камайтиришга қаратилган шошилинч чоралар пакети тасдиқланганини эслатди. Ушбу режа доирасида ресурслар сафарбар этилиб, назорат ваколатлари кенгайтирилди, ҳуқуқ-тартибот идоралари иштирокида рейдлар кучайтирилди ва қисқа фурсатда чиқинди чиқарувчи манбалар устидан қатъийроқ назорат ўрнатилиб, ижобий силжишлар қайд этилди.
Раҳбарият экологик ислоҳотларда шахсий намуна ва кундалик турмуш маданиятини ҳам муҳим “ўйин” деб кўрмоқда. Саида Мирзиёева уйида ҳароратни 21–23 даража атрофида ушлаб туришини айтиб, бу нафақат энергия тежамкорлигини оширишини, балки болалар саломатлиги бўйича тиббий тавсияларга ҳам мос келишини билдирди. У Германия ва Жанубий Корея тажрибасини мисол қилиб, хонада иссиқликни меъёрида ушлаб, қалинроқ кийиниш одатини Ўзбекистонда ҳам босқичма-босқич оммалаштиришга чақирди.
Тадбиркорлик сектори билан ишлашда эса экологик масъулият бизнес юритишнинг мажбурий стандартига айланиши кераклиги қайд этилди. Ҳозирда тадбиркорларни экологик хавфсизлик талаблари бўйича ўқитиш кучайтирилмоқда, ишлаб чиқариш объектларида замонавий фильтрлаш тизимларини ўрнатиш асосий талаб бўлиб қолмоқда. Саида Мирзиёевага кўра, мажбурий чоралар ва тизимли мониторинг натижа беряпти, кейинги босқичда транспорт йўналишида ҳам талаблар кучайиб, техник ҳолат учун масъулият фуқароларнинг ўзига ҳам тегишли бўлади.
Унинг фикрича, дунёқарашдаги бурилиш аввало таълимдан бошланиши шарт. Саида Мирзиёева битирувчилардa етакчилик кўникмалари бўйича муаммоларни таҳлил қилар экан, совет давридан қолган “коллективчилик” индивидуал ташаббусни сиқиб қўйганини таъкидлади. Таълим тизими технологик тезликдан ортда қолмай, ёшлар онгига шахсий жавобгарлик — ўз келажаги ва атроф-муҳит учун масъулият ҳиссини сингдириши лозимлиги айтилди. Давлат ҳаммасини ҳал қилиб беради, деган пассив кутиш ёндашуви ютқазади, ютадиган эса масъулиятни зиммасига ола билганлар бўлади.
Якунда, президент Шавкат Мирзиёевнинг декабрдаги мурожаатида 2026 йил учун экология аҳамияти иқтисодий кўрсаткичлар билан тенг қўйилгани эслатилди. Дастурий мақсадлар қаторида шаҳарларда кенг кўламли кўкаламзорлаштириш, сув йўқотишларини камайтириш учун суғориш каналларини ёпиқ тизимга ўтказиш, экологик тоза жамоат транспортни ривожлантириш ва саноатда қатъий экостандартларни жорий этиш бор. Экокун тартиби энди шунчаки баёнот эмас — амалий ижрога ва қатъий маъмурий назоратга ўтган.
“Яшил макон” дастури доирасида мамлакатда дарахтларнинг рақамли харитаси яратилди. Бу экилган кўчатлар сонини кузатиш, ҳар бир дарахтга масъул ходим ёки ташкилотни бириктириш имконини бериб, минтақанинг қуруқ иқлими шароитида кўчатларнинг яшаб кетиш кўрсаткичини оширишга хизмат қилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
