Ўзбекистонда рухсат этилмаган ҳудудларда чўмилиш учун маъмурий жарималар белгилаш режалаштирилмоқда. Сувда хавфсизликни кучайтиришга қаратилган қонун лойиҳаси ҳозир муҳокама босқичида. Бу ҳақда podrobno.uz хабар беради.
Лойиҳага кўра, Маъмурий жавобгарлик тўғрисидаги кодекс янги 204-2-модда билан тўлдирилади. У сув объектларида хавфсизлик қоидаларини бузиш, жумладан тақиқловчи белгилар ўрнатилган жойларда чўмилиш ҳолатларини ҳам қамраб олади.
Ҳужжатда биринчи бор қоидабузарлик учун фуқароларга 1 базавий ҳисоблаш миқдори — 412 минг сўм жарима қўллаш таклиф қилинмоқда. Такроран қоидабузарлик содир этилса, жарима 3 БҲМ — 1,236 миллион сўмгача ошади. Сув объектларида хавфсизлик учун масъул мансабдор шахслар учун эса жарима 5 БҲМ — 2,06 миллион сўмгача етиши мумкин.
Қонун лойиҳаси сув ҳавзаларда бахтсиз ҳодисалар ва ҳалокатлар кўпайиб бораётгани фонида ишлаб чиқилган. Мутахассислар буни давлат назоратининг етарли эмаслиги ҳамда жавобгарлик механизмларининг суслиги билан изоҳламоқда. Янги чоралар идоралар назоратини кучайтириш, шунингдек хавфли ҳудудларда дам олувчиларнинг шахсий масъулиятини оширишга хизмат қилиши кутилмоқда.
Аввалроқ Чирчиқ дарёсида тўпни олиб чиқмоқчи бўлган ўсмир чўкиб кетгани ҳақида хабар берилганди.
“Zamin”ни Telegram'да ўқинг!
