Жорий йилнинг 11–15 январ кунлари БААнинг Абу-Даби шаҳрида Abu Dhabi Sustainability Week 2026 халқаро форуми бўлиб ўтди. Барқарор ривожланиш, қайта тикланувчи энергия, иқлим молияси ҳамда “яшил” иқтисодиёт атрофида тўпланган ушбу ҳафталикда 150 дан ортиқ давлатлардан давлат идоралари, йирик компаниялар ва нуфузли молия институтлари раҳбарлари иштирок этди.
Форум доирасида Ўзбекистон учун муҳим қадам ташланди: Ўзбекистон Энергетика вазирлиги, Masdar ва Emirates Utilities Development Company (EUDC) ўртасида мамлакатда 24/7 режимида — яъни сутка давомида узлуксиз ишлайдиган — 1 ГВтгача базавий юклама қувватини таъминлайдиган лойиҳани ишлаб чиқиш бўйича ҳамкорлик ҳужжати имзоланди.
Мазкур тадбирда Ўзбекистон бош вазири ўринбосари Жамшид Хўжаев, энергетика вазири Жўрабек Мирзамаҳмудов, БАА энергетика ва инфратузилма вазири Суҳайл Муҳаммад ал-Мазруий, шунингдек Masdar компанияси бош ижрочи директори Муҳаммад Жамил Ал Рамаҳий иштирок этди. Қайд этилишича, ҳужжатлар “Ўзенергосотиш” АЖ, Masdar ва Etihad Water & Electricity (EUDC’нинг бош компанияси) томонидан расман имзоланган.
Маълумотларга кўра, лойиҳа сутка бўйи тўхтамай ишлайдиган қувватларни йўлга қўйишни кўзда тутади. Бу эса қайта тикланувчи энергетикада кўп муҳокама қилинадиган базавий қувват муаммосига амалий ечим бўлиши, энергия таъминотидаги узилишларни қисқартириши ва ишончли “яшил” энергияга ўсиб бораётган талабни қондиришга хизмат қилиши мумкин.
Шу билан бирга, ташаббус рақобатбардош тарифлар асосида катта ҳажмда базавий қувват ишлаб чиқариш имконини очиши, келгусида эса халқаро миқёсда ҳам қўлланиши мумкин бўлган намунавий лойиҳа сифатида кўрилаётгани таъкидланди. Яъни, бу фақат битта лойиҳа эмас — келажакдаги йирик “яшил” энергетика моделларига йўл очадиган тажриба бўлиши ҳам эҳтимол.
“Zamin”ни Telegram'да ўқинг!
