АҚШ президенти Доналд Трамп Тинчлик кенгаши низомини имзолади – бу амалда БМТга мухолиф сифатида ташкил этилган янги халқаро орган ҳисобланади.
Имзолаш маросими Давосдаги Жаҳон иқтисодий форуми доирасида бўлиб ўтди. Унда Яқин Шарқ ва Жанубий Америка (Саудия Арабистони, Қатар, БАА, Аргентина, Парагвай), шунингдек, Ўзбекистон президенти Шавкат Мирзиёев, Венгрия бош вазири Виктор Орбан, Арманистон бош вазири Никол Пашинян ва Озарбойжон президенти Илҳом Алиев иштирок этди.
Саҳнада Трамп билан бирга 20 га яқин давлат вакиллари бор эди ва улар орасида АҚШнинг Ғарбий Европадаги анъанавий иттифоқчиларидан ҳеч бири йўқ эди, деб таъкидлайди CNN.
Трампнинг ўзига кўра, Тинчлик кенгаши БМТ каби бошқа кўплаб ташкилотлар билан ҳамкорлик қилади.
Трампнинг нутқидан сўнг, Оқ уй матбуот котиби Кэролайн Левитт Тинчлик Кенгаши энди расман халқаро ташкилот эканини эълон қилди. Кейин давлатлар раҳбарлари ҳужжатни имзолаш учун бирма-бир Трампнинг ёнига боришди.
Тинчлик кенгаши Трампнинг тинчлик режасига мувофиқ урушдан кейин Ғазо секторини бошқариш органи сифатида ишлаб чиқилган. Бироқ, аслида, унинг низомидан маълум бўлишича, у анча кенгроқ функцияларга эга бўлади ва моҳиятан БМТга муқобил бўлади. Кенгашга Трампнинг ўзи раислик қилади ва унга умрбод аъзолик учун мамлакатларга бир миллиард доллардан маблағ ажратиш таклиф қилинмоқда.
Тинчлик кенгашига аъзо бўлиш учун 60 га яқин давлат, жумладан, Россия, Беларус ва Украина таклиф олган. 20 январ куни Александр Лукашенко Европада биринчи бўлиб Кенгашга аъзо бўлиш тўғрисидаги ҳужжатни имзолади. Шу билан бирга, Европанинг бир қатор давлатлари унга аъзо бўлишдан бош тортмоқда, бунга Россия ҳам таклиф этилгани сабаб бўлмоқда.
Владимир Путин Россия таклифнома олганини тасдиқлади ва Россия Ғазони бошқариш органи сифатида ташкил этилган Тинчлик кенгашига Россиянинг АҚШда блокланган активлари ҳисобидан 1 миллиард долларни топширишга тайёрлигини айтди.
“Zamin”ни Telegram'да ўқинг!
