Ўзбекистонда 6 мингга яқин дориларнинг нархи пасайтирилади

Фармацевтика агентлиги директори Абдулла Азизов дори воситалари учун референт нархлар пасайтирилаётганини маълум қилди. Унинг айтишича, бу қарор нафақат импорт дорилар баҳосини тартибга солиш, балки аҳоли учун дорихоналардаги нархларни ҳам босқичма-босқич енгиллаштиришга хизмат қилади.

Азизов 20 январь куни президент ҳузурида ўтган йиғилишдан кейин “Ўзбекистон 24” телеканалига берган интервьюсида муҳим рақамларни келтирди. Унга кўра, 5 декабрь куни 2 мингта дори препаратининг нархи дистрибюторлар учун ўртача 40–60 фоизгача туширилган.

“5 декабрда 2 мингта дори препаратининг нархларини дистрибюторлар учун ўртача 40-60 фоизга туширдик, бу – юртимизга 70 млн доллар қайтишига олиб келди”, — деди агентлик раҳбари.

Мутахассис таъкидлашича, айнан шу 2 мингта препарат бўйича референт нархлар пасайиши дорихоналардаги чакана нархларда ҳам сезилади. Унинг сўзларига кўра, бу ўзгаришлар 1 мартдан бошлаб амалдаги нархларда акс этиши кутилмоқда.

Шу билан бирга, Фармацевтика агентлиги томонидан янги низом ҳам тайёрланган. Унга асосан, яна 4 мингта импорт дори воситасининг нархи туширилиши режалаштирилган. Демак, йил давомида умумий ҳисобда 6 мингга яқин дори воситасининг баҳоси арзонлашиши эҳтимоли бор.

“Янги низом ишлаб чиқилган, унга кўра яна 4 мингта импорт дори воситасининг нархи тушиши кутиляпти. Яъни йил давомида 6 мингга яқин дори воситаларининг нархи тушади”, — деди Азизов.

Яна бир муҳим янгилик — 2026 йилда электрон рецепт тизими тўлиқ ишга туширилиши белгиланган. Ҳозирча бу йўналишда ишлар кетяпти, аммо рақамлар тизимдан фойдаланиш ҳали кутилган даражада эмаслигини кўрсатади.

Агентлик раҳбарининг маълум қилишича, бугунга қадар 400 мингдан ортиқ электрон рецепт ёзиб берилган (тақдимотда 387 мингта кўрсатилган), лекин уларнинг фақат 54 мингтаси дорихоналарда реал сотувда ишлатилган.

Шу сабаб, эндиликда назорат кескинлаштирилади. Азизов Бош прокуратура билан биргаликда ишларни жадаллаштириш, дорихоналарда электрон рецепт амалиёти ҳақиқатан ҳам ишлаяптими-йўқми — текшириш режалаштирилаётганини билдирди. Бундан ташқари, Солиқ қўмитасидан олинадиган маълумотлар асосида гормонал ва антибиотик дорилар электрон рецепт билан сотилаётгани ёки йўқлиги ҳам алоҳида кузатувга олинади.

Қисқаси, референт нархларнинг туширилиши ва электрон рецептни тўлиқ жорий қилиш — дорилар бозорида тартиб ва шаффофликни кучайтириши, аҳоли учун эса дорихона хариди оғриғини бироз бўлса ҳам енгиллаштириши кутилмоқда.