Ҳаж ва Умрага бориш учун энди ягона портал орқали рўйхатдан ўтиш мажбурий этиб белгиланди. Бу ҳақда Вазирлар Маҳкамасининг 24 январ куни қабул қилинган 27-сонли “Ҳаж ва Умра тадбирларини ташкил этиш ва ўтказиш фаолияти такомиллаштирилиши муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида” қарорида сўз боради. Яъни, зиёрат ишларини тартибга солиш ва жараённи шаффофроқ қилиш мақсад қилинган.
Қайд этилишича, мазкур ҳужжат билан республикада “Ҳаж ва Умра ягона портали” ишга туширилган. Эндиликда зиёратга бориш истагида бўлган фуқаролар учун ушбу портал орқали рўйхатдан ўтиш мажбурий этиб белгиланган. Демак, сафарга отланишдан олдин маълумотларни ягона тизимга киритиш шарт бўлади.
Қарорга мувофиқ, янги тартиб қуйидаги муддатлардан бошлаб кучга киради:
-2026 йил 1 февралдан бошлаб – Ҳаж тадбирига;
-2026 йил 1 майдан бошлаб – Умра зиёратига бориш учун порталда рўйхатдан ўтиш шарт.
Эътиборли жиҳати – зиёратчилар ҳақидаги маълумотлар порталга киритилмасдан туриб сафарларни ташкил этишга йўл қўйилмайди. Бу эса ўз навбатида тизимлилик ва тартибни кучайтиришга хизмат қилади.
“Zamin”ни Telegram'да ўқинг!
