Ўзбекистонда маҳаллий бошқарувни такомиллаштириш ва давлат идоралари фаолиятида очиқликни кучайтиришга қаратилган “Ҳалоллик ороллари” антикоррупция методологиясини жорий этишнинг иккинчи босқичи ишга туширилди. Илк босқич натижалари айрим ҳудудларда ёндашув амалий самара беришини кўрсатган. Бу ҳақда uzdaily.uz хабар беради.
Иккинчи босқичнинг очилиш тадбири Тўрткўл туманида бўлиб ўтди. Унда Қорақалпоғистон Республикаси Жўқорғи Кенгеси суд-ҳуқуқ масалалари ва коррупцияга қарши кураш қўмитаси раиси Атажанов Алишер, Коррупцияга қарши курашиш агентлиги директор ўринбосари Умида Тухташева, Тўрткўл тумани ҳокими Илхомбой Худойберганов, БМТ Тараққиёт дастурининг Ўзбекистондаги доимий вакили Акико Фудзии ҳамда Европа Иттифоқи делегацияси ҳамкорлик бўлими раҳбари Христос Маразопулос иштирок этди.
Методологияни синовдан ўтказишнинг биринчи даври 2024–2025 йилларда Бухоро вилоятининг Вобкент тумани, Жиззах шаҳри ва Тошкент шаҳрининг Мирзо Улуғбек туманида ўтказилган. Жараёнда маҳаллий ҳокимлик ва идоралар коррупцион хавфларни аниқлаш, ички тартиб-таомилларни қайта кўриб чиқиш ҳамда ҳудуд шароитига мос амалий ечимларни ишлаб чиқишга қаратилган тизимли семинар ва муҳокамаларда қатнашган.
Натижада ҳар бир пилот ҳудуд учун стратегик “йўл харитаси” ҳамда 2025–2026 йилларга мўлжалланган аниқ чоралар режалари шакллантирилиб, коррупция хавфини камайтиришга қаратилган қадамлар белгилаб берилган.
2026 йилда методологияни қўллаш доираси яна олти ҳудудга кенгайтирилади: Хоразм вилояти Ҳазорасп тумани, Навоий вилояти Конимех тумани, Самарқанд вилояти Жомбой тумани, Фарғона вилояти Олтиариқ тумани, Наманган вилояти Поп тумани ва Қорақалпоғистон Республикаси Тўрткўл тумани.
Иккинчи босқичнинг асосий вазифаси — биринчи босқичдан олинган сабоқларни амалиётга татбиқ этиш, маҳаллий бошқарувнинг кундалик ишида ҳалоллик ва масъулият тамойилларини янада мустаҳкамлаш. Лойиҳа Европа Иттифоқи молиявий кўмагида, Коррупцияга қарши курашиш агентлиги ҳамда Миллий антикоррупция кенгаши билан яқин ҳамкорликда амалга оширилмоқда.
БМТ Тараққиёт дастури методологияни Ўзбекистон шароитига мослаштириб, ҳудудларда жорий этиш жараёнига ҳамроҳлик қиладиган миллий мутахассислар гуруҳини тайёрлаган. Кенгайтириш доирасида ички жараёнларни соддалаштириш ва кучайтириш, жамоатчилик назоратини ошириш ҳамда фуқароларни маҳаллий даражада коррупциянинг олдини олишга фаол жалб этиш устувор йўналиш сифатида кўрилмоқда.
“Ҳалоллик ороллари” ёндашуви халқаро миқёсда тан олинган бўлиб, Марказий, Шарқий ва Жануби-Шарқий Европанинг 11 давлатда, 30 дан ортиқ маҳаллий ўзини ўзи бошқариш органларида қўлланади. 2011 йилда у БМТнинг давлат хизмати ривожига қўшган ҳиссаси учун мукофотига сазовор бўлган, шунингдек, Вена шаҳридаги Халқаро антикоррупция академияси ва Гаагадаги маҳаллий ўзини ўзи бошқариш академиясида ўқитилади.
Якка шахсларни жазолашга қаратилган ёндашувлардан фарқли равишда, “Ҳалоллик ороллари” тизимдаги заиф нуқталарни аниқлаш, маҳаллий реал шароитдан келиб чиқиб амалий ечимлар ишлаб чиқишга ёрдам беради. Ўзбекистонда ушбу методология Коррупцияга қарши курашиш агентлиги ва БМТ Тараққиёт дастурининг Европа Иттифоқи томонидан молиялаштирилаётган “Ўзбекистонда миллий антикоррупция экотизимини мустаҳкамлаш” қўшма лойиҳаси доирасида жорий этилмоқда.
“Zamin”ни Telegram'да ўқинг!
