Ўзбекистонда савдони тубдан ўзгартирадиган қарор лойиҳаси эълон қилинди

Президентнинг “Савдони янада либераллаштириш ва товар бозорларида рақобатни ривожлантириш чора-тадбирлари тўғрисида”ги қарори лойиҳаси жамоатчилик муҳокамаси учун эълон қилинди.

Ҳужжат билан 2019 йил 1 январдан:

- улгуржи савдони амалга ошириш учун лицензиялар борлиги ҳақидаги талаб ва улгуржи савдо корхоналарини солиққа тортишнинг махсус тартиби;

- акцизли товарларнинг айрим турлари ишлаб чиқарилиши ва реализация қилинишнинг амалдаги тартиби (автомобиллар, ўсимлик мойи, алкоголь ва тамаки маҳсулотлари ҳамда бошқалар);

- жойга чиқиб савдо қилиш учун рухсатнома ҳужжатини бериш бўйича талаблар;

- тадбиркорлик субъектлари контрагентлари билан муносабатларда келиб чиқадиган, муддати бўлган дебиторлик қарздорлиги учун санкциялар;

- тадбиркорлик субъектларида келишувлар бўйича ички бозорда 15%лик олдиндан тўлов талаби;

- томонлар ўртасида тузилган шартнома асосида тўлов шартларини ҳисобга олган ҳолда янги мева-сабзавот маҳсулоти экспортида 100 фоиз миқдорида олдиндан тўлов ҳақидаги талаб;

- айрим турдаги товарларни экспорт қилиш бўйича чекловлар;

- истеъмолчилар томонидан табиий газ ва электр энергиясини шартномада кўрсатилганидан кўпроқ истеъмол қилингани учун жарима санкциялари;

- юқори ликвидли товарлар, хомашё ва материалларни биржа савдосига чиқариш жадвалларини шакллантириш ва уни Рақобат қўмитаси билан келиши амалдаги тартиби ва бошқаларни бекор қилиш мўлжалланмоқда.

Шунингдек, 2018 йил 1 октябрдан импорт бўйича олиб кирилган юқори ликвидли маҳсулот турлари, эгалари ўз хоҳишига кўра, ички бозорда, шу жумладан, биржа савдоларида чекловларсиз сотилиши мумкин.

Жорий йилнинг 1 октябридан Ўзбекистон Республикасидан жисмоний шахслар учун 5 минг АҚШ долларига тенг бўлган рухсат этилган валюта миқдори доирасида товарларни олиб чиқишга рухсат берилиши мумкин. “Замин” янгиликларини “Facebook”да кузатиб боринг