Президентлар Корейс маданияти ва санъати уйининг очилиш маросимида иштирок этди (фото)

  • 20 апрель 2019, 16:16
  • 798
  • Ўзбекистон
  • Президентлар Корейс маданияти ва санъати уйининг очилиш маросимида иштирок этди (фото)
    Тошкент шаҳрида 20 апрель куни Корейс маданияти ва санъати уйининг тантанали очилиш маросими бўлди. Бу ҳақда Президент матбуот хизмати маълум қилди.

    Шавкат Мирзиёев ва Мун Чже Ин рафиқалари билан биргаликда ушбу дўстлик ва маданият саройини очди.

    Фото: Президент матбуот хизмати
    Саҳнада корейсларнинг Ўзбекистонга кўчириб келиниши, ўзбек халқи билан аҳил яшаши ҳақида бадиий композиция намойиш этилди.

    Фото: Президент матбуот хизмати
    Маълумки, 1937 йилда Узоқ Шарқдан ўн минглаб корейслар мамлакатга кўчирилган. Ўша пайтдаги қийинчиликларга қарамай, ўзбек халқи уларни очиқ қалб билан қабул қилган, уларга бошпана бериб, меҳр кўрсатган. Ўзининг меҳнатсеварлиги ва қатъий иродаси, халқларнинг менталитети ўхшашлиги туфайли корейслар бу ерда иккинчи Ватанини топди. Улар Ўзбекистоннинг тенг ҳуқуқли фуқаросига, жамиятнинг фаол аъзоларига айланди.

    Фото: Президент матбуот хизмати
    Бугунги кунда Ўзбекистонда 180 мингдан зиёд корейс миллатига мансуб юртдошлар яшайди. Уларнинг уч юзга яқини давлатнинг юксак мукофотлари билан тақдирланган.

    Давлат раҳбарлари ўзбекистонлик корейс рассомлари асарлари кўргазмаси билан ҳам танишди.

    Фото: Президент матбуот хизмати
    Корейс маданият ва санъат уйи 478 ўринли киноконцерт зали, конференциялар зали, кутубхона, бадиий галерея, ресторан ва хизмат хоналарни ўз ичига олган. У жамоатчилик ва ёшлар интиладиган, муштарак маданиятларни бойитадиган яна бир масканга айланади.

    Фото: Президент матбуот хизмати
    Бугун куннинг иккинчи ярмида Президентлар Самарқандга ташриф буюриб, диққатга сазовор жойлар билан танишади.

    Фикрлар

    » » Президентлар Корейс маданияти ва санъати уйининг очилиш маросимида иштирок этди (фото)