Жаҳон автомобил компаниялари Хитойнинг нодир ер металлари экспортига киритилаётган чекловлардан олдин зарур хомашёни топишга шошилмоқда. Бу металлардан автомобилларнинг моторлари, тормоз тизимлари, сенсорлари ва электротехник қисмларида кенг фойдаланилади. Мутахассисларнинг айтишича, чекловлар эҳтиёт қисмлар танқислигига ва ишлаб чиқаришнинг тўхтаб қолишига олиб келиши мумкин.
Хитой ҳозирда дунёдаги нодир ер металлари қазиб олишнинг 70 фоизини, уларни қайта ишлашнинг 85 фоизини назорат қилади. Шу сабабли янги экспорт назорати глобал автомобил саноатига катта босим ўтказмоқда. АҚШ ва Австралия бу қарамликни камайтириш мақсадида қўшма кон лойиҳаларини йўлга қўймоқда, бироқ оғир металларнинг деярли барчаси ҳануз Хитойда қайта ишланади.
Автомобил ишлаб чиқарувчилар, жумладан Toyota, Hyundai ва Bosch компаниялари чекловлар кучга киришидан аввал захира йиғишга уринмоқда. Баъзи компаниялар эса, масалан BMW нодир ер металларсиз моторлар ишлаб чиқиш лойиҳаларини бошлаган. Аммо бу технологияларни оммавий ишлаб чиқариш учун ҳали бир неча йил керак бўлади.
Таҳлилчилар фикрича, Хитойнинг нарх сиёсати бошқа давлатларга рақобат қилишни қийинлаштирмоқда. Экспертлар Пекиннинг экспорт назоратини яқин йилларда янада кучайтириши мумкинлигини айтмоқда. Шу сабабли, автомобил саноати ҳали узоқ вақт давомида Хитойнинг нодир ер металлари таъминотига боғлиқ бўлиб қолади.
