Ўзбекистонда йўл ҳаракати хавфсизлигини кучайтиришга қаратилган янги тартиб босқичма-босқич амалга киритилмоқда. Энди тезликни ошириш билан боғлиқ қоидабузарликлар нафақат жарима, балки махсус балл тизими орқали ҳам баҳоланади. Бу ҳақда Вазирлар Маҳкамасининг 296-сонли қарорида белгилаб ўтилган.
Янги тизимга кўра, ҳайдовчилар содир этган ҳар бир тезлик қоидабузарлиги учун шахсий профилига махсус жарима балллари ёзиб борилади. Мақсад — доимий равишда қоида бузувчи ҳайдовчиларни аниқлаш ва йўлларда хавфли вазиятларни камайтиришдан иборат.
Қарорга мувофиқ, тезликни ошириш даражасига қараб балл миқдори ҳам турлича бўлади.
Агар ҳайдовчи белгиланган меъёрдан 20 км/соатгача юқори тезликда ҳаракат қилса, унга 0,5 балл қўшилади. 20 км/соатдан 40 км/соатгача ортиқча тезлик қайд этилса, 1 балл ёзилади.
Шунингдек, 40–60 км/соат оралиғида тезликни оширган ҳайдовчи 1,5 балл олади. Энг жиддий ҳолат — 60 км/соатдан юқори тезликда ҳаракатланиш эса 2 балл билан баҳоланади.
Эътиборлиси, ушбу балллар бир марта билан чекланиб қолмайди. Улар йиғилиб боради ва умумий ҳисоб юритилади. Агар ҳайдовчининг умумий балли 12 тадан ошиб кетса, унга нисбатан анча қаттиқ чора қўлланади.
Янги тартибга асосан, 12 баллдан юқори кўрсаткич қайд этилган тақдирда ҳайдовчи 6 ой муддатга транспорт воситасини бошқариш ҳуқуқидан маҳрум қилиниши мумкин. Кейинчалик рулга қайта ўтириш масаласи тегишли суд қарори асосида ҳал этилади.
Мутахассислар фикрича, мазкур тизим ҳайдовчиларни интизомли бўлишга ундайди. Чунки аввал айримлар жаримани тўлаб, яна қоидабузарликни такрорлашда давом этар эди. Энди эса ҳар бир ҳаракат шахсий рейтингга таъсир кўрсатади.
Йўл ҳаракати хавфсизлиги соҳаси вакиллари ҳам ушбу механизм авариялар сонини қисқартириш ва ҳайдовчилар масъулиятини оширишга хизмат қилишини таъкидламоқда.
Айниқса, юқори тезлик сабабли содир бўладиган оғир йўл-транспорт ҳодисаларининг олдини олишда бу каби назорат тизими муҳим аҳамият касб этиши айтилмоқда.
“Zamin”ни Telegram'да ўқинг!
