Tesla хитойликларга эски машиналарни электрокарларга алмаштиришни таклиф қилмоқда

^{Tesla Model S © insideevs.com}

Tesla Motors компанияси ўзининг хитойлик мижозларига Trade-in тизими орқали Model S электр седанини сотиб олишни таклиф қилмоқда. Яъни, хоҳловчилар ўзларининг эски автомобилларини қўшимча ҳақ тўлаб янги электрокарга алмаштиришлари мумкин. Бу ҳақда “Bloomberg” агентлиги'га асосланиб “Kun.uz” хабар берди.

Tesla ушбу лойиҳа доирасида минилган машиналар савдоси билан шуғулланувчи Пекин, Шанхай ва Гуанчжоудаги компаниялар билан ҳамкорлик қилади. Эски машиналар учун бу ташкилотлардан олинган пуллар Model S’нинг нархидан айириб ташланади.

Хитой бозорида бу седаннинг нархи 648 минг юан (104 минг доллар)дан бошланади.

Tesla Хитой бозорига жорий йилнинг баҳоридан бошлаб расмий равишда чиққан. Ўшанда компаниянинг раҳбари Элон Маск уч-тўрт йилдан кейин Хитойда электрокарларни ишлаб чиқаришни йўлга қўйишни режалаштираётганини маълум қилган эди.

Ҳозирда ушбу компания Хитойда ўзининг 9та дилерлик маркази ва 6та техник хизмат кўрсатиш станциясини очган.

Tesla, шунингдек, China Unicom ва Soho China Ltd каби маҳаллий компаниялар билан бирга электромобиллар учун қувватлаш станцияларини қуришни мўлжалламоқда.

Ҳозирда Хитойнинг 70га яқин шаҳарларида шундай станцияларнинг 700дан кўпроғи фаолият юритмоқда. Теsla вакилларининг маълум қилишларича, электромобиллар учун бундан-да ривожланган инфратузилма фақатгина АҚШда бор.