Россияда топ-менежерларнинг сирли ўлимлари давом этади

^{Фото: Getty Images}
Москвада «Лукойл» нефт компанияси директорлар кенгаши раиси Равиль Маганов жонсиз ҳолда топилди. У марказий клиник шифохона деразасидан йиқилиб тушган. Пайшанба куни Россия нашрлари ўз манбаларига таяниб Магановнинг ўлими ҳақида хабар берди.

«Бугун эрталаб Маганов марказий клиник шифохона деразасидан қулаб тушди. У олган жароҳатлари натижасида вафот этди», - деб хабар берди «Интерфакс» манбаси. «Коммерсант»нинг қайд этишича, Маганов бинонинг олтинчи қаватидаги деразадан қулаган. Газетанинг маълумот беришича, у оғир юрак-қон томир касаллиги туфайли шифохонада даволанаётган бўлган.

Тез орада марказий клиник шифохона ва тергов қўмитаси Магановнинг ўлимини тасдиқлади. Тергов қўмитаси гап ўз жонига суиқасд тўғрисида бориши мумкинлигини билдирган. Ҳозирча терговга қадар суриштирув олиб борилмоқда, жиноят иши қўзғатилгани тўғрисида хабар қилинмаган.

«Лукойл» эса Равил Маганов «оғир касалликдан сўнг ҳаётдан кўз юмгани» ҳақида хабар берди.

67 ёшли Маганов 1993 йилдан буён «Лукойл»да ишлаб келаётганди. У 1994 йилдан компания вице-президенти сифатида фаолият юритган. Маганов 2020 йилда компания директорлар кенгаши раисига айланган. Унинг укаси Наил Маганов - «Татнефт» бош директори.

Украинада уруш бошланганидан сўнг «Лукойл» Буюк Британия санкцияларига тушган. Санкциялар рўйхатига хусусан, компания президенти Вагит Алекперов киритилган, кейинроқ у «Лукойл»даги барча лавозимларини тарк этганди. Асосий шахслардан бири бўлмиш вице-президент Леонид Федун ҳам компаниядан кетган.

Март ойи бошларида «Лукойл» директорлар кенгаши урушга қарши чиққанди. Компания сайтида Украинадаги қуролли можарони тўхтатишга чақирилган баёнот эълон қилинганди.

Топ-менежерлар ўлими

Reuters агентлигининг Маганов билан яхши таниш бўлган икки манбаси у ўз жонига қасд қилганига ишониш қийинлигини айтди.

«Лукойл»га яқин яна бир манба эса компания раҳбарияти ўз жонига суиқасд деб ҳисоблаётганини, аммо буни тасдиқлайдиган далил ёки ҳужжатларни кўрмаганини айтди.

Агентлик охирги бир неча ой ичида Россия энергетика соҳасига алоқадор бир неча мансабдор ноаниқ сабаблар билан вафот этганига эътибор қаратган.

30 январда «Газпром Инвест» компанияси транспорт хизмати раҳбари Леонид Шульман вафот этди. Унинг жасади ёнидан ўлими олдидан ёзилган мактуб топилган.

25 феврал куни, Россия Украинага бостириб кирганининг эртасига «Газпром» ягона ҳисоб-китоб маркази бош директори ўринбосари Александр Тюляков жонсиз ҳолда топилди. ОАВ маълумотига кўра, унинг ёнидан ҳам ўлимолди мактуби топилган.

18 апрелда «Газпромбанк» собиқ вице-президенти Владислав Аваев ва унинг икки нафар оила аъзоси ўлик ҳолда топилгани хабар қилинди. Дастлабки тахминга кўра, хотини ва қизини Аваевнинг ўзи ўлдирган, кейин эса ўз жонига қасд қилган, деб ёзди «Коммерсант».

21 апрелда Испаниядаги қасрда «Новатэк» бош ҳисобчиси Сергей Протосеня, унинг хотини ва қизининг жасадлари топилди. Маҳаллий полиция 55 ёшли Протосеня оила аъзоларини болта билан ўлдиргани, сўнгра ўз жонига қасд қилганини тахмин қилган.

8 май куни эса Митишчидаги ҳовлида «Лукойл» собиқ топ-менежери Александр Субботин жонсиз ҳолда топилади. У гўёки шаман томонидан ўтказилган маросим чоғида юрак етишмовчилигидан вафот этгани хабар қилинди.

5 июлда Петербург яқинидаги коттеж посёлкасидаги бассейнда «Газпром» компанияси пудратчиси Юрий Вороновнинг жасади топилди. Дастлабки тахминга кўра, у ўз жонига қасд қилган.

Янгиликлар