Россиялик миллиардер ўзига қарши санкцияларни бекор қилиш эвазига Украинага 1 миллиард доллар таклиф қилди

^{Фото: Bloomberg}
Россиялик тадбиркор Михаил Фридман ўзининг 1 миллиард долларлик шахсий бойлигини ўзи асос солган Украина банкига ўтказишни таклиф қилмоқда, бу таклиф Буюк Британияни унга қарши санкцияларни бекор қилишга ундашдан иборат. Бу ҳақда Wall Street Journal хабар бермоқда.

«Қора рўйхат»га тушган кўплаб россиялик тадбиркорлар, шунингдек, бутун банк ва компаниялар Ғарбдаги расмийларга яширинча шу каби келишувларни таклиф қилмоқда.

- Буюк Британия ҳар қандай санкциядан қочишни маъқулламайди, — дейди Британия Ташқи ишлар вазирлиги бу ҳолатга изоҳ берар экан.

Фридманнинг ўзи бундай таклиф берганини рад этади, аммо Британия аллақачон WSJ’га бу ҳақда маълум қилган.

Март ойидан бошлаб Фридманнинг Буюк Британиядаги активлари музлатиб қўйилган. Компаниялар ва сармоядорлар ўзлари санкцияга дучор бўлмаслик учун у билан алоқаларини узмоқда.

Фридман таклиф қилаётган маблағ Украинадаги инфратузилма, соғлиқни сақлаш, озиқ-овқат ва энергетика хавфсизлиги билан боғлиқ муҳим лойиҳаларни молиялаштиришга сарфланиши кўзда тутилган.

Михаил Фридман Россия Алфа банкининг назорат пакетига эга. У ва унинг бизнес ҳамкорлари Петр Авен, Герман Хан Европа Иттифоқи ва Буюк Британиянинг санкциялар рўйхатига тушган, бироқ ҳозиргача АҚШ санкцияларидан қочиб қутилишга муваффақ бўлган. “Замин” янгиликларини “Telegram”да кузатиб боринг