Украина бош вазири ўринбосари: Россиядан босиб олинган ҳудудларга келган ўқитувчилар суд қилинади

^{Ирина Верешчук / Фото: babel.ua}
Украина Қуролли кучларининг қарши ҳужуми давомида озод қилинган Украина ҳудудларида мактабларга дарс бериш учун келган рус ўқитувчилари қўлга олинди. Энди улар уруш қонунлари ва урф-одатларини бузганлик ҳақидаги жиноий модда бўйича судланади, деди Украина бош вазири ўринбосари Ирина Верешчук 12 сентябр, душанба куни.

«Улар давлатимизга қарши жиноят содир этишди. Биз Украина ҳудудига келиб, бу ерда қонун билан тақиқланган фаолиятни амалга оширишга рози бўлган Россия фуқароларини кўп марта огоҳлантирганмиз», — деди Верешчук «Страна.ua» нашрига. У энди суд қўлга олинган ўқитувчиларга эҳтиёт чорасини қўллаши кераклигини таъкидлади. Нашр ушланган ўқитувчилар ҳақида батафсил маълумот бермаган. Уруш қонунлари ва урф-одатларини бузиш ҳақидаги моддада 8 йилдан 12 йилгача озодликдан маҳрум қилиш жазоси назарда тутилган.

Бундан ташқари, Россия дастури бўйича дарс беришга рози бўлган украиналик ўқитувчилар ҳам коллаборацион фаолияти учун жазоланиши керак, деди бош вазир ўринбосари. «Жиддий жазо муддатлари бор ва мен вақтинча босиб олинган ҳудудлардаги барча ўқитувчиларни яна бир бор огоҳлантираман: ҳеч қандай ҳолатда душман ва босқинчи билан ҳамкорлик қилмаслик керак, имкон қадар тезроқ эвакуацияга чиқиб кетиш ва шу билан ўз ҳаёти ва соғлиғини сақлаб қолиш лозим», - дея таъкидлади Верешчук.

Верешчукнинг таъкидлашича, Украина ҳукумати рус ўқитувчиларини алмашиш учун асирлар деб ҳисобламайди. «Ҳеч ким уларни ҳарбий асирлар деб ҳисобламайди, чунки улар жангчилар эмас, Женева конвенцияларида ҳарбий асир бўлмаганлар алмашинуви кўзда тутилмаган», деди у.

Бош вазир ўринбосарининг сўзларига кўра, «вақтинча босиб олинган ҳудудларга келган ва бу ҳудудларни тарк этмаса, албатта жазоланадиган маълум миқдордаги Россия фуқаролари» ҳамон Украинада бўлиб турибди.

Аввалроқ украиналик депутат Олексий Гончаренко Харкив областининг Купянск шаҳрида Россиядан украиналик болаларга дарс бериш учун келган ўқитувчилар қўлга олинганини маълум қилганди. Июль ойида «Медиазона» «босиб олинган шаҳарларда дарс бериш истагини» аллақачон Россиянинг 30 та ҳудудидан 200 дан ортиқ киши билдирганини хабар қилган. Унинг маълумотига кўра, ўқитувчилар рўйхати кўрсатилган жадвал Доғистон Таълим вазирлиги томонидан хатолик туфайли чоп этилган. “Замин” янгиликларини “Telegram”да кузатиб боринг