17:37 / 14.09.2022

ОАВ: Путин уруш бошида Украина бўйича тинчлик режасини рад этган

^{Фото: Reuters}
Украинага қарши ҳарбий тажовуз бошланишида Россия президенти маъмурияти раҳбари ўринбосари Дмитрий Козак Киев билан Москванинг Украина НАТО таркибига кирмаслиги ҳақидаги талабини қондирадиган дастлабки келишувни тайёрлаган. Бироқ Россия президенти Владимир Путин келишувни рад этган ва ҳарбий кампанияни давом эттирган. Бу ҳақда 14 сентябр, чоршанба куни Reuters агентлиги Россия раҳбариятига яқин бўлган уч манбага таяниб хабар берди.

Суҳбатдошларнинг сўзига кўра, Козак Путинга, унинг фикрича, у эришган келишув Россия томонидан Украинани кенг кўламли босиб олиш заруратини бартараф қилишини айтган ва Россия президентига келишувни қабул қилишни тавсия этган.

Урушдан олдин Владимир Путин НАТО ва унинг ҳарбий инфратузилмаси Россия чегараларига яқинлашаётганини ва бу Россия учун экзистенциал хавф туғдираётганини бир неча бор таъкидлаган эди, дея эслатган агентлик.

Путин дастлаб Киев билан музокараларни қўллаб-қувватлаган бўлса-да, Козакнинг келишуви унга тақдим этилганда, Украина билан музокаралар натижасида эришилган имтиёзлар етарли эмаслиги ва мақсадларини кенгайтиргани, бу Украина ҳудудларини аннексия қилишни ҳам ўз ичига олишини айтган, деб хабар қилди Reuters манбалари.

«24 февралдан кейин Козак карт-бланш олди: унга яшил чироқ ёқилди ва у келишувга эришди. У келишув билан қайтиб келди ва ундан вазиятга аралашмасликни талаб қилишди. Ҳаммаси бекор қилинди. Путин йўлда шунчаки режани ўзгартириб борди», - дейди агентликнинг Россия раҳбариятига яқин суҳбатдошларидан бири. Бошқа бир манбанинг айтишича, келишувларга 24 февралдаги кенг кўламли босқиндан сал аввал эришилган.

Натижада келишувни рад этишга қарор қилинган.

Россия президенти матбуот котиби Дмитрий Песков Reuters агентлигининг манбалар маълумотларига изоҳ бериш сўровига жавобан шундай деди: «Бунинг ҳақиқатга мутлақо алоқаси йўқ. Бундай нарса бўлмаган. Мутлақо нотўғри маълумот».

Козак, ўз навбатида, Кремл орқали юборилган изоҳ сўровига жавоб бермади.

Украина президенти девони раҳбари маслаҳатчиси Михаил Подолякнинг айтишича, Россия кенг кўламли босқинга тайёргарлик кўриш фонида музокаралардан тутун пардаси сифатида фойдаланган. Украиналик сиёсатчи музокаралар моҳияти ҳақидаги саволга жавоб бермади ва дастлабки келишувга эришилганини тасдиқламади. «Бугун биз Россия томони ҳеч қачон тинч йўл билан келишувдан манфаатдор бўлмаганини аниқ тушуниб турибмиз», деди Подоляк.

Россия президенти маъмурияти раҳбари ўринбосари Дмитрий Козак Донбассдаги келишув масаласида Кремлнинг асосий музокарачиси бўлган. Январ ойида, Россиянинг кенг кўламли бостириб киришидан олдин, у музокаралар жараёнини фаол равишда илгари сурган. Хусусан, 6 январ куни Козак «Норманд шакли»даги давлатларнинг Украина бўйича махсус вакиллари, хусусан, Германия канцлерининг ташқи сиёсат бўйича маслаҳатчиси Йенс Плётнер ва Франция президентининг дипломатик маслаҳатчиси Эммануэл Бонн билан учрашди. 2021 йил июл ойида Козак Украина «Россия учун фойдали ёки зарарли» бўлишидан қатъи назар, Европа иттифоқи ва НАТОга қўшилиш бўйича қарор қабул қилиш ҳуқуқига эга эканлигини айтди.