«Украинада уруш кетмоқда». Қодиров ҳам тўлиқ мобилизация кераклигини айтди

^{Елена Афонина / ТАСС}
Партиялар етакчилари ортидан Чеченистон раҳбари ҳам умуммиллий сафарбарлик ҳақида гапириб, буни Украинада «махсус ҳарбий амалиёт» урушга айлангани билан изоҳлади.

Рамзан Қодиров ўзининг Telegram-каналида Харкивни тарк этган Россия ҳабийлари манзилига ёғдирилаётган танқидларга жавобан видео эълон қилди. У Россиядаги партия етакчиларининг сўзларини қўллаб-қувватлаган ҳолда Украинада уруш кетаётганини айтди ва унда ғолиб бўлиш учун мобилизация (эркакларни ёппасига урушга сафарбар этиш) кераклигини айтди.

Постга илова қилинган матнда Қодировнинг сўзлари ўзгартирилган ва қисқартирилган ҳолатда келтирилган.

«Фейк ва ғийбатлар шунчалик кўпки. Баъзи фуқаролар эса уларга ишониб қолмоқда. Устига устак сенга қарши АҚШ ва Британия бошлиқ ўнлаб давлатлар қарши чиқиб турганда. Украинада тўлиқ мобилизация кетмоқда, умрида автомат кўрмаган қишлоқ одамлари териб кетилмоқда.

Агар мендан сўрайдиган бўлишса, вазият кундай равшан. Қўмондонларимизнинг кайфиятлари жанговар, лекин «махсус ҳарбий амалиёт» (Россияда урушни шундай аташади) аллақачон ҳарбий ҳаракатларга айланиб кетган. Менга қолса, аллақачон аҳолини ҳарбий ҳолат ва мобилизация эълон қилинишига тайёрлаган, барчаси тезроқ тугаши учун бор имкониятдан фойдаланган бўлардим», дейди Чеченистон раҳбари.

Қодировнинг айтишича, бу сўзларни Чеченистон раҳбари сифатида эмас, оддий ватанпарвар ҳамда кўнгилли сифатида айтган. Унинг сўзларига кўра, Украинага улар кутганидан кўпроқ ёрдам берилган. Қодиров Россия Херсон ва Харкивни олгани, бу жуда катта ҳудуд экани, ҳозир армияга барча ҳудудлар ёрдам бериши кераклигини таъкидлаган.

«Мобилизацияни кутиб ўтириш ҳам шарт эмас, регионлар ўзларида бор куч ва маблағларни бериши, қўлидан келадиган ёрдамни таклиф этиши керак. Гапириш, ҳарф теришдан осони йўқ, лекин иш бошқа масала. «Махсус ҳарбий амалиёт»нинг бориши бизни қаноатлантирмаётган бўлса-да, биз ўзимизникиларни қўллашимиз керак.

Биз НАТО билан курашяпмиз, «махсус ҳарбий амалиёт» якунланса ҳам, бизнинг бу шайтонлар билан урушимиз тугамайди. Биз ортга чекиниш учун уруш бошлаганимиз йўқ. Президентнинг қарорини кутамиз», деган Қодиров.

У Россия чекинаётгани ҳақида гаплар Ғарбнинг уйдирмаси эканини айтиб, тактика ва стратегия деган нарсалар борлигини эслатган.

«Ҳарбий академияни тамомлаган генералларимиз ҳарбий ишнинг нозиклигини яхши тушунади. Улар душманга фақат бизга қулай бўлган нарсаларни беришади», деган Чеченистон раҳбари.

Россия Украинада бўлаётган урушни уруш деб аташ тақиқланган, уни «махсус ҳарбий амалиёт» деб аташади. Аммо охирги вақтларда Россия фронтда муваффақиятсизликка учраши фонида юқори минбарларда ҳам Украинада уруш кетаётгани ҳақида гапира бошлашди. «Справедливая Россия» партияси етакчиси Сергей Миронов сиёсий партия етакчилари орасида биринчи бўлиб Украинада уруш кетаётгани, аввалига «махсус ҳарбий амалиёт» бошлангани, энди эса НАТО билан уруш кетаётганини таъкидлади. У Россия тезроқ бюджет ва иқтисодиётни мобилизация қилиши кераклигини айтиб, Украинадаги ижтимоий инфратузилмалар: темирйўллар, кўприклар ва туннелларни йўқ қилишга чақирди.

Коммунистик партия етакчиси Геннадий Зюганов ҳам умуммиллий сафарбарлик бошлашга чақирди ва янада кескинроқ баёнот берди.

«Махсус ҳарбий амалиётнинг урушдан қандай фарқи бор? Ҳарбий операцияни исталган вақтда тўхтата оласиз, урушни эса йўқ. У ёки ғалаба ёки мағлубият билан тугайди. Ҳозир ваҳима қилиш керак эмас, мамлакатда тўлиқ мобилизация ўтказиш керак. Ҳозир бошқача қонунлар керак», деди коммунистлар етакчиси.

Кейинроқ Коммунистик партия ахборот хизмати Зюганов аслида иқтисодий мобилизация ҳақида гапирганини айтиб баёнот берди.

Украина бош вазири ўринбосари Олга Стефанишинанинг айтишича, охирги кунларда россиялик сиёсатчилар украиналик ҳамкасблари билан музокараларни тиклаш бўйича кўп марта боғланишга ҳаракат қилган. Урушни тугатишнинг йўлларидан бири эса айнан музокаралардир.

Маълумот учун, сентябр ойига келиб фронтда жиддий ўзгаришлар кузатилди. Украина Россия билан чегарадаги Харкив вилоятини деярли тўлиқ озод қилди. Купянск ва Изюм каби стратегик муҳим шаҳарларнинг қўлга киритилиши фронтда жиддий ўзгариш ясади. Шунингдек, Украина Херсон йўналишида ҳам кескин қарши ҳужумга ўтган. Украина 6 минг квадрат километрдан ортиқ ҳудуддаги юзлаб аҳоли яшаш яшаш манзилларини қайтариб олди. Ғарб экспертлари бу Украина фронтда устунликни қўлга олганини англатиши ва бу ҳолат урушда бурилиш нуқтаси бўлиши мумкинлигини тахмин қилишмоқда. “Замин” янгиликларини “Telegram”да кузатиб боринг