09:30 / 24.09.2022

G7 етакчилари Кремл «референдумлари» ва сафарбарликни қоралади

^{Фото: Reuters}
G7 мамлакатлари етакчилари Украинанинг босиб олинган ҳудудлари – Запорижжя ва Херсон областларининг бир қисмида, шунингдек, ўзини «ДХР» ва «ЛХР» деб эълон қилган ҳудудларда Россияга қўшилиш бўйича ўтказилаётган «референдумлар»ни кескин қоралади. Бу сохта референдумлар «ҳеч қандай юридик куч ва қонунийликка эга эмас», дейилади 23 сентябр, жума куни G7 веб-сайтида эълон қилинган қўшма баёнотда.

Россия босиб олинган ҳудудларда «демократик меъёрларни эътиборсиз қолдирмоқда», «маҳаллий аҳолини очиқдан-очиқ қўрқитмоқда», дейилади ҳужжатда. Оккупацион ҳокимият томонидан уюштирилган «овоз бериш» Россиянинг давлат чегараларини мажбуран ўзгартиришга уринишларига доимий қаршилик кўрсатаётган Украина халқининг иродасини акс эттирмайди, дея маълум қилинган баёнотда.

Германия, АҚШ, Канада, Франция, Буюк Британия, Италия ва Японияни ўз ичига олган G7 на «референдумлар»нинг ўзини, на уларнинг «натижалари»дан кейин кутилаётган Украина минтақаларининг Россия томонидан аннексия қилинишини ҳеч қачон тан олмаслиги ҳақида огоҳлантирди. Бундан ташқари, баёнотда можаронинг янада кучайиб бораётгани, жумладан, Россия президенти Владимир Путин томонидан эълон қилинган, россияликларнинг мамлакатдан оммавий чиқиб кетишига сабаб бўлган сафарбарлик ва Кремлнинг «масъулиятсиз ядровий риторика»сидан афсус билдирилган.

G7 дунёнинг барча мамлакатларини «Россиянинг халқаро ҳуқуқни бузгани учун ёлғон ниқоб яратишга уриниши» бўлган сохта «референдумлари»ни тан олмасликка чақирди ва Россиянинг Украинанинг суверен ҳудудини аннексия қилишга уриниш бўйича ноқонуний ҳаракатларини қўллаб-қувватловчи шахслар ва гуруҳларга нисбатан кейинги иқтисодий санкциялар қўллашга ваъда берди.

Путиннинг эълон қилган сафарбарлиги фонида Европа иттифоқи ва Украина ташқи ишлар вазирлари Нью-Йоркда норасмий фавқулодда йиғилиш ўтказдилар. Саккизинчи санкциялар пакети жуда тез тақдим этилиши мумкин, деди Еврокомиссия матбуот котиби Эрик Мамер.

Кремль дуч келиши мумкин бўлган чекловлар қаторига G7 давлатлари аввалроқ келишиб олган Россия нефти нархларининг юқори чегараси, жисмоний ва юридик шахсларга нисбатан индивидуал жазо чоралари ҳамда Европа иттифоқи Россияга экспорт қиладиган бир қанча технологияларнинг қўшимча экспорт назорати бўйича таклиф киритилиши мумкин.

25 октябр куни Берлинда G7 томонидан ташкил этилган Украинани тиклаш, реконструкция ва модернизация қилиш бўйича халқаро конференция бўлиб ўтади. G7 раҳбарлари июнь ойида Баварияда бўлиб ўтган ташкилот саммити чоғида Украина президенти Володимир Зеленскийга мамлакатни тиклашда ёрдам беришга ваъда қилишган эди.

Бироқ, танқидчилар G7 ўз ваъдаларида аниқроқ бўлиши керак, деб ҳисоблайди - масалан, Германия канцлери Олаф Шолц DW журналистининг G7 конференция давомида Зеленскийга ваъда қилган урушдан кейинги хавфсизлик кафолатлари ҳақидаги саволига тушунарсиз жавоб қайтарди. Бу журналистлар ва мухолиф немис сиёсатчиларининг норозилигига сабаб бўлди.