Фото: Deutsche Welle
Қозоғистон Республикаси Марказий сайлов комиссияси (МСК) Қосим-Жўмарт Тўқаев президентликка номзодларга қўйиладиган талабларга жавоб беришини маълум қилди.
«Президентликка номзод Тўқаев Қосим-Жўмарт Кемелули Конституция ва «Сайлов тўғрисида»ги қонунда кўзда тутилган талабларга жавоб бериши белгилансин. Номзодни қўллаб-қувватловчи имзоларни тўплаш учун зарур миқдорда имзо варақалари берилсин», - дейилади МСК қарорида.
МСК йиғилишида ҳуқуқ-тартибот идораларида ҳам номзод бўйича ҳеч қандай эътироз йўқлиги маълум қилинди. Қонунга кўра, амалдаги президент давлат тилини билиш даражаси бўйича имтиҳон топшириши шарт эмас.
Қозоғистонда навбатдан ташқари президент сайлови 2022 йил 20 ноябрда бўлиб ўтади.
Аввалроқ, Қосим-Жўмарт Тўқаев номзоди «Аманат», «Ак Жол» ва Қозоғистон Халқ партияси иштирокида тузилган «халқ коалицияси» томонидан президент сайловида қатнашиш учун илгари сурилган эди.
Тўқаев 2019 йилда Қозоғистоннинг биринчи президенти, мамлакатни 1990 йилдан бери бошқариб келган Нурсултон Назарбоев истеъфога чиққанидан сўнг президентлик лавозимини эгаллаган.
2022 йил январь ойида Қозоғистонда бўлиб ўтган норозилик намойишларидан сўнг, Тўқаев Конституцияга ўзгартириш киритиш ташаббуси билан чиқди. Унда давлат раҳбари фақат бир маротаба, етти йиллик муддатга сайланиши мумкинлигини белгилаб қўйилди. Илгари президент беш йилга сайланган, бироқ қайта сайланиш ҳуқуқига эга эди.
Шундан сўнг, Тўқаев ноябрь ойида, муддатидан икки йил олдин навбатдан ташқари президент сайловини ўтказишни таклиф қилди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
