16:05 / 29.10.2022

Норвегияда қўлга олинган «бразилиялик профессор» «ГРУ» зобити бўлиб чиқди

^{Фото: The Guardian}
Октябрь ойида қўлга олинган Норвегиянинг Тромсё Арктика университети ходими, ўзини бразилиялик профессор Жозе Ассиса Жиаммариа деб атаган шахс аслида Россия фуқароси, Россия ҳарбий разведкасининг мансабдор зобити Михаил Валеревич Микушиндир. 28 октябр, жума куни Норвегия полицияси хавфсизлик хизмати (PST) унга жосусликда айблов қўйилганини маълум қилди.

Belligcat ва The Insider суриштирув порталларига кўра, улар Микушиннинг Россия махсус хизматларига тегишли эканлигини тасдиқлашга муваффақ бўлишган.

The Insider нашрининг ёзишича, Микушин 1978 йилда Екатеринбургда туғилган. 2006 йилда у «ГРУ»нинг Москвадаги Ҳарбий-дипломатик академиясини (ҲДА) тамомлаган ва онаси гўёки бразилиялик бўлганлиги сабабли Бразилия паспортини олишга муваффақ бўлган.

2011 йилда Михаил Микушин Канадага Калгари университетида ўқишга борган, лекин вақти-вақти билан Россияга келиб турган. 2015 йил июнь ойида у Россияда ҳайдовчилик гувоҳномасини янгилаган, бир неча ойдан кейин эса Канадада Янги Демократик партия учун сайловолди ташвиқотини олиб борган. Бир мунча вақт Микушин Канадада «тадқиқотлар» олиб борган, 2019 йилда у ҳатто Арктикада янги ҳарбий базалар зарурлиги ҳақида мақола чоп этган, дея таъкидлайди The Insider.

2021 йилда Микушин Норвегияга Тромсё университетидаги «гибрид таҳдидларни» ўрганишни ҳам ўз ичига оладиган тадқиқот дастури учун келган. Аммо унинг фаолияти Норвегия билан чегараланиб қолмади. Бир ой олдин у Вилнюсда Европа Иттифоқи кўмагида «гибрид уруш» бўйича ўтказилган тренингда қатнашган. Тренинг мавзуларидан бири - «Шимолий оқим» газ қувурида қўпорувчилик содир бўлган тақдирда қандай жавоб бериш кераклиги эди.

Норвегиянинг NRK телеканали хабарига кўра, 28 октябр куни Осло суди прокуратура талабини қондирди ва Микушинни тўрт ҳафталик ҳибсда қолдиришга қарор қилди.

The Insider нашрининг ёзишича, Микушиннинг адвокатига ўз мижозини Россияга депортация қилиш нияти борлиги ҳақида маълум қилинган, бироқ Москва унинг Россия фуқаролигига эга эканлигини инкор этяпти ва Норвегияни жосуслик маниясида айблаяпти.