АҚШ ҳарбийлари Украинадаги ғарб қуролларини текширмоқда

^{Фото: AP}
Пентагон Украинага берилган ғарб қуролларини текширишни қайта бошлаганини эълон қилди, улар кенг кўламли уруш бошланишидан олдин ўтказилган. Украиналиклар ғарб қуроллари ҳисоби юритилишини қўллаб-қувватлаяпти.

Айни пайтда бир гуруҳ америкалик ҳарбий хизматчилар Украинада бўлиб, тўлиқ миқёсли уруш бошланганидан бери бу мамлакатга ўтказилган миллиардлаб долларлик ғарб қуролларини текширмоқда ва ҳисобга олмоқда. Бу ҳақда 31 октябр, душанба куни АҚШ Мудофаа вазирлигининг юқори мартабали вакили журналистларга маълум қилди.

Миссияга бригада генерали Гаррик Ҳармон бошчилик қилмоқда ва текширув АҚШнинг Киевдаги элчихонасига қайтган мудофаа ҳамкорлиги бошқармаси ходимлари иштирокида олиб борилмоқда. «Бундай бир нечта текширувлар аввал ҳам бўлган», - дея Пентагон вакили сўзларини келтиради АҚШнинг NBC телеканали.

У, шунингдек, украиналиклар текширувлар ўтказилишини қўллаб-қувватлашини ва маълумотларни «жуда шаффоф» тақдим этаётганини таъкидлади, бироқ текширувлар ўтказиладиган жойлар ҳақида тафсилотларни ошкор этишдан бош тортди. АҚШ мудофаа расмийси ушбу текширувларда қанча америкалик аскар иштирок этаётгани ёки улар фронт чизиғига қанчалик яқин келганига аниқлик киритмади.

Текширувлар ғарб қуролларини назорат қилиш кампаниясининг бир қисмидир.

Шунга ўхшаш текширувлар урушдан олдин ўтказилган, аммо у бошланганидан кейин бир неча ой давомида тўхтатилган, дейилади маълумотда. NBC таъкидлашича, америкалик ҳарбий инспекторлар Россия босқини бошланганидан бери Украинага расман кирган биринчи америкалик ҳарбий хизматчилардан бири ҳисобланади. Уларнинг иши ҳақида Украинага олиб борилган Америка қуролларининг қора бозорда пайдо бўлганига оид хавотирлар фонида маълум бўлди.

Ўз навбатида, AP агентлигининг ёзишича, бу текширувлар Киев билан ҳамкорликнинг кенгроқ узоқ муддатли режа бир қисми бўлиб, у бошқа нарсалар қатори ғарб қуролларидан фойдаланиш устидан биргаликда назоратни кучайтиришни назарда тутади. Кампания ҳақида ўтган ҳафта Давлат департаменти эълон қилган эди. Шу тариқа, Қўшма Штатлар Россия қўшинлари, уларнинг шериклари ва бошқа экстремистик гуруҳларга ғарб қуролларининг эҳтимолий тушиб қолиши олдини олишга ҳаракат қилмоқда, дея қайд этади агентлик.

30 октябр куни Украинадан Финландияга қурол-яроғ билан боғлиқ можара ҳақида маълум бўлди. Хелсинки полицияси разведка маълумотларига таяниб, Россия босқинидан ҳимоя қилиш учун Киевга юборилган қуроллар Финландия жиноий гуруҳлари қўлига тушиб қолган бўлиши мумкинлигини билдирди. Гап, хусусан, милтиқлар ҳақида кетаётган бўлиши мумкин, деди полиция бўлимининг жиноятларни тергов қилиш бўйича комиссари Кристер Аҳлгрен.

Унга кўра, Украинага мўлжалланган қуроллар Швеция, Дания ва Нидерландияда ҳам топилган. Яширин қурол савдоси, шунингдек, уюшган жиноятчиликка алоқадор халқаро миқёсда фаолият юритувчи байкер клублари орқали ҳам амалга оширилади. “Замин” янгиликларини “Telegram”да кузатиб боринг