Фото: Tomasz Wszczuk/EPA, via Shutterstock
Полша Яқин Шарқдан келувчи потенциал мигрантлар оқимини тўхтатиш учун энди Россиянинг Калининград области билан чегарада ҳам сим тўсиқли девор қурмоқчилигини эълон қилди. Варшава бу ҳаракатини Москва янги миграция инқирозини юзага келтириши мумкинлиги билан изоҳлади.
Полша мудофаа вазири Мариуш Блашчак Москва ўз ҳудудидан ноқонуний миграция канали сифатида фойдаланишига йўл қўймаслик учун Полшанинг Россиянинг Калининград области билан 225 километрлик чегара чизиғида ўтган йили Беларус билан чегарада қурилгани каби, икки ярим метрлик девор тикланишини маълум қилди.
2 ноябр куни полшалик аскарларнинг тиканли сим ётқизиш учун Россия билан чегарага келиши Украинадаги уруш сабаб Европанинг Россиядан изоляция сиёсати кучайиб бораётганини яна бир бор кўрсатди. Шунингдек, бу Москва ва Варшаванинг Калининград ҳамда Европа Иттифоқи ўртасидаги трансчегаравий ҳамкорликни ривожлантириш бўйича ўн йиллик саъй-ҳаракатларига ҳам қатъий нуқта қўйди.
Полша мудофаа вазирининг айтишича, у Россиянинг Яқин Шарқ ва Шимолий Африкадан Калининградга парвозларни бошлаш ҳақида яқинда қабул қилган қарори сабаб чегарани ёпишга буйруқ берган. Унинг фикрича, бу парвозлар Болтиқ денгизи бўйидаги Россия анклавини Европага киришга интилаётган муҳожирлар оқими учун очиб беради.
Россия Украинага бостириб кирганидан бери Полша миллионлаб украиналикларни, асосан аёллар ва болаларни мамлакатга қабул қилди ҳамда уларнинг 1,4 миллионга яқини вақтинчалик ҳимоя учун Полшада рўйхатдан ўтди. БМТнинг Қочқинлар ишлари бўйича агентлиги маълумотларига кўра, Полша бу борада Европа Иттифоқидаги энг юқори кўрсаткичга эга.
Бироқ Полша ҳукуматини назорат қилувчи ўнг қанот партияси бўлмиш «Қонун ва адолат» партияси бошқа мамлакатлардан келаётган муҳожирларга нисбатан қаттиқ позицияни эгаллади. Варшава Россиянинг яқин иттифоқчиси бўлган Беларус президенти Александр Лукашенкони мигрантлардан «гибрид уруш» қуроли сифатида фойдаланганликда айблади.
Полша-Беларус чегарасидаги босим ўтган йилнинг ноябр ойида, Полша ҳарбийлари чегарада баланд девор қура бошлагач ва Беларус ҳукумати Полшага киришга умид қилган минглаб инсонлар, асосан Ироқдан келган этник курдлар жойлашган улкан чегара лагерини тозалагандан кейин пасайди.
Блашчакнинг огоҳлантиришича, Полша худди шундай муаммога энди Россиянинг Калининград области билан чегарада тўқнаш келиши мумкин.
Яна бир миграция инқирозидан қўрқувнинг кучайиши ҳукмрон партияга сиёсий ёрдам бериши ҳам мумкин. Сўнгги ижтимоий сўровномаларга кўра, ҳукмрон «Қонун ва адолат» партиясининг рейтинги анча пасайган. Партия ўтган йили Беларус билан чегарада юз берган кескинликдан миллатчи электоратини йиғиш ва мигрантлар оқимига қарши кўрилган чораларни етарли эмас деб атаган мухолифатга зарба бериш учун фойдаланганди.
Полшанинг Беларусдан келаётган муҳожирларга нисбатан кескин муносабатда бўлиши «Қонун ва адолат» партияси мухолифлари ва католик черковининг айрим аъзолари томонидан кенг танқидга қилинди, бироқ ҳукмрон партиянинг асосий сайловчиларининг кўпчилиги томонидан қўллаб-қувватланди.
Беларус билан чегарадаги девор «гибрид ҳужумнинг олдини олгани ёки ҳужумни сезиларли даражада секинлаштиргани»ни таъкидлаган Блашчак, Калининград чегарасидаги янги тўсиқ ҳам шу вазифани бажаришини айтган. У, шунингдек, мухолифатга пичинг қилиб, «бу сафар мухолифат полшалик аскар ва чегарачиларга босим ўтказмаслиги»га умид қилишини қўшимча қилган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
