Фото: Global Look Press
Украина президенти Владимир Зеленский ўзи учун Россия билан ярашув музокаралари имкониятини истисно қилмаяпти. Бу ҳақда у CNN нашрига берган интервьюсида айтиб ўтди.
«Мен музокаралар учун эшикларни ёпиб қўйганим йўқ. Мен айтдимки, биз Россия билан гаплашишга тайёрмиз, лекин у бошқача Россия бўлиши керак. Яъни ҳақиқатда тинчлик ўрнатишга тайёр Россия бўлиши керак», — деди Зеленский.
У 8 ноябрь куни Россия билан мулоқот бошлаш учун Украинанинг шартларини маълум қилганди. Улар эса Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши, БМТга ҳурмат, барча зарарларнинг қопланиши, ҳар битта ҳарбий жиноятчининг жазоланиши ва бу бошқа ҳеч қачон такрорланмаслигининг кафолатланишидан иборат эди.
CNN’га берган интервьюсида у «ҳозирча Россия Федерациясидан — на Путиндан ва на бошқа бирон кимдан бу шартларга тайёрлиги ҳақида баёнотлар эшитмагани»ни айтди.
Зеленскийнинг сўзларига кўра, у Россия томонидан ультиматумлардан бошқа ҳеч қандай гаплар эшитмаган.
Аввалроқ Украина президенти Владимир Зеленскийнинг Россия билан музокаралар учун шартлари ҳақидаги баёноти АҚШнинг «енгилгина турткиси» билан боғлиқ бўлгани ҳақида хабар берилганди.
30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.
4 октябрь куни эса Украина расман Путин билан ҳар қандай музокаралардан бош тортди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
