Украина қўшини Херсонга кира бошлади. Фронтдаги вазият бўйича сўнгги маълумотлар

^{Антонов кўпригидаги портлаш / Twitter}
Россия ҳарбийлари Днепр дарёсининг ўнг соҳилини тарк этишди. РФ мудофаа вазирлиги Россия қўшини бўлинмаларини Днепрнинг чап соҳилига ўтказиш жараёни Москва вақти билан соат 5:00 да якунланганини маълум қилди.

«Ўнг соҳилда бирорта ҳарбий техника ва қурол қолмади. Барча россиялик ҳарбий хизматчилар Днепрнинг чап соҳилига олиб ўтилди. Россия қуролли кучлари тузилмалари ва ҳарбий қисмлари олдиндан тайёрланган мудофаа чизиқлари ва позицияларини эгаллади. Россия қўшинлари гуруҳининг шахсий таркиб, қурол-яроғ, ҳарбий техникалар ва моддий воситаларида йўқотишларга йўл қўйилмади», дейилган вазирлик хабарида.

Россия давлат агентлиги РИА Новости Днепрнинг ўнг ва чап соҳилини боғловчи Херсон яқинидаги Антонов кўпригида олинган видеони намойиш этган. Унда агентлик мухбири 11 ноябрга ўтар кечаси «Россия қўшинларининг сўнгги қисми» ўнг соҳилни тарк этгани ҳақида айтади. Видеода кўприк бўйлаб ҳаракатланган ғилдиракли техникалар акс этган. Мухбирнинг сўзларига кўра, оғир техникалар, жумладан танк ва жанговар пиёдалар машиналари (БМП) кўприк яқинидаги понтон кечув йўли орқали ўтказилган.

ВГТРК ҳарбий мухбири Александр Сладков 11 ноябр тонгида уч кун ичида Днепрнинг ўнг соҳилидан чап соҳилига шахсий таркибдан 20 минг киши ва 3,5 минг ҳарбий техника олиб ўтилганини хабар қилган.

Москва вақти билан 11 ноябр куни соат 4:00 даёқ Украина қуролли кучлари «Жануб» қуруқлик қўшини оператив қўмондонлиги Россия ҳарбийлар ва техникаларини Днепрнинг нариги соҳилига ташишда давом этаётгани, чап соҳилда мудофаа чизиғи ташкил этиб, Украина армиясининг ўнг соҳилдаги позицияларини ўққа тутаётганини хабар қилганди. Хабарда украин қўшинлари фронт чизиғини чап соҳилга тобора яқинлаштираётгани, Россия кучлари эса «шошилинчда сузиб ўтиш учун яроқли бўлган қайиқларга чопаётгани» қайд этилган. 10 ноябр куни кечқурун «Жануб» гуруҳи матбуот котиби Наталья Гуменюк РФ қуролли кучлари қўшинларининг бир қисмини олиб чиққани, аммо бўлинмалар ва техникаларнинг бир қисми Днепрнинг ўнг соҳилида қолаётганини айтганди.

Шу билан бирга аннексия қилинган Херсон областининг Россия томонидан тайинланган маъмурияти вакили, айни вақтда Симферополда бўлиб турган Сергей Елисеев «Интерфакс»га берган интервьюсида Россия кучларини Днепрнинг ўнг соҳилидан олиб ўтиш давом этаётганини айтганди.

Херсондаги Антонов кўприги вайрон қилинган

11 ноябр куни тонгда кремлпараст телеграм-каналлар Антонов кўприги портлатилгани акс этган видеони (бу видео ҳақиқийлиги ва қачон олингани тасдиқланмаган) тарқата бошлади. Шунингдек, Россия нашрлари хабарларига кўра, параллел ўтган темирйўл кўприги ҳам вайрон қилинган (бунга далил келтирилмаган). Россиялик «ватанпарвар» телеграм-каналлар ёзишича, кўприкнинг портлатилиши Россия гуруҳининг ўнг соҳилдан олиб чиқилиши якунлангани ҳақида «сигнал» бўлган.

«Комсомольская правда» ҳарбий мухбири Александр Коц ва «Смотри» телеграм-канали тўғридан тўғри кўприкда туриб олинган видеоёзувни, Украина томонига тегишли бўлган «Суспільне» канали эса — маҳаллий аҳоли вакиллари томонидан олинган кўприк фотосуратини нашр этган. Видео ва фотода кўприкнинг автомобиллар учун мўлжалланган полотносида иккита оралиқ ёпмаси қулаб тушганини кўриш мумкин. Шу билан бирга, Сергей Елисеев Антонов кўприги «портлатилмагани» ва «доимий ҳолатида тургани»ни қайд этган.

Украина мудофаа Алексей Резников аввалроқ Россия Днепрнинг ўнг соҳилидаги қўшинларини олиб кетиши учун бир ҳафта вақт талаб этилиши ҳақида гапирганди. У бу ҳақда Reuters агентлигида 10 ноябр куни чиққан интервьюсида айтиб ўтган. Резников истило вақтида Херсон областида гўёки россияликларнинг 40 минглик қўшини бўлиб турганини айтган. «Бу қўшинларни Херсондан бир ёки икки кун ичида олиб кетиб бўлмайди. Бу камида бир ҳафта вақт олади», — деганди вазир. У Россиянинг ҳаракатларини олдиндан айтиш қийинлигини қўшимча қилган.

10 ноябр куни Украина президенти Володимир Зеленский мамлакат қуролли кучлари Херсон областида 41 та аҳоли яшаш манзилларини озод этганини маълум қилди. У бу ҳудудлар номларини келтирмаган ва гап қанча вақт ичида озод этилган ҳудудлар ҳақида бораётганига аниқлик киритмаган. Украина қуролли кучлари Бош штаби 9 ноябр куни мамлакат армияси Херсон йўналишида 12 та аҳоли пунктини озод этганини маълум қилганди. 10 ноябр куни украин ҳарбийлари Миколайив области таркибидаги Снигиревка шаҳарчаси озод этилганини хабар қилишди — бу Днепр дарёсининг ўнг соҳилидаги муҳим логистик узел ҳисобланади. Reuters агентлиги озод этилган Снигиревкада олинган фотосуратларни намойиш этган.

Кремль қўшинлар олиб кетилганига қарамай, аннексия қилинган Херсон областини РФ субъекти деб ҳисоблашда давом этмоқда. Бу ҳақда РФ президенти матбуот котиби Дмитрий Песков журналистлар билан суҳбатда айтиб ўтди. «Бу Россия Федерацияси субъекти, бу мақом қонунчиликда мустаҳкамлаб қўйилган. Бу борада ўзгариш бўлиши мумкин эмас», — деган Песков. У Кремль Херсон ташлаб чиқилишини шармандалик деб ҳисобламаслигини билдирган.

^{РФ мудофаа вазирлигининг Украина жанубидаги вазият акс этган харитасида Херсон Украина назоратига қайтгани акс этган}
Украина қўшини Херсонга кира бошлади

11 ноябр куни куннинг иккинчи ярмида Украина қуролли кучларининг илк қисмлари Херсонга кириб кела бошлади. Бу маълумотни «Громадське» нашрига шаҳар маҳаллий аҳолиси, маҳаллий журналистлар, шунингдек Херсон области маъмуриятидаги манбалар тасдиқлаган.

Ижтимоий тармоқларда Херсон аҳолиси шаҳар кўчаларида украин аскарларини олқишлаётгани акс этган фото ва видеолар тарқалган. Шунингдек, ҳарбийлар Херсондаги полиция бошқармасига Украина байроғини илаётгани акс этган кадрлар пайдо бўлди.

Бундан ташқари, интернетда Херсон области маъмурияти биноси олдида Украина байроғини тутиб турган одамлар фотоси тарқалди.

Украина ҳукумати ҳам, Украина армияси ҳам ҳозирча мамлакат қуролли кучлари шаҳарга киргани тўғрисида расман эълон қилмади. Аммо украин мулозимлари бунга ишора қилишмоқда. Хусусан, Украина президенти офиси раҳбари Андрей Ермак телеграм-каналида «11.11.2022» санаси билан қисқа пост қолдирган. “Замин” янгиликларини “Telegram”да кузатиб боринг