18:05 / 15.11.2022

Зеленский Украинадаги урушни тугатишнинг 10 та шартини айтди

^{Фото: Украина президенти матбуот хизмати}
Украина президенти Владимир Зеленский 15 ноябрь куни Индонезиянинг Бали оролидаги G20 саммитида Украинадаги урушни тугатиш учун 10 шартни санаб ўтди.

Президент саммитда онлайн иштирок этиб, Украина учун тинчлик формуласи ҳақида гапирди. У қуйидаги мажбуриятларни ўз ичига олади.

1. Украинанинг радиациявий ва ядровий хавфсизлигини таъминлаш;
2. Украинанинг озиқ-овқат хавфсизлигини таъминлаш;
3. Мамлакатнинг энергетика хавфсизлигини таъминлаш;
4. Барча маҳбусларни ва депортация қилинганларни озод қилиш;
5. БМТ низомини амалга ошириш ва Украинанинг ҳудудий яхлитлигини ҳамда дунё тартибини тиклаш;
6. Россия қўшинларини олиб чиқиб кетиш ва ҳарбий ҳаракатларни тўхтатиш;
7. Адолатнинг қайтиши;
8. Экоцидга қарши кураш;
9. Эскалациянинг олдини олиш;
10. Урушнинг тугашига эришиш.

Зеленскийга кўра, Россия Украинанинг ҳудудий яхлитлигини тасдиқлаши, ўз қўшинларини мамлакат ҳудудидан олиб чиқиб кетиши, шунингдек, урушдан етказилган зарарни қоплаши керак. Президент «урушдан кейинги хавфсизлик архитектурасининг асосий элементларини мустаҳкамлаш» ва Россиянинг янги ҳужумининг олдини олиш мақсадида халқаро конференция ташкил этишга чақирди.

«Урушга қарши барча чоралар жорий этилганда томонлар уруш тугаши ҳақидаги ҳужжатни имзолаши керак. Биз Россияни кутишига, у кучларини тўплашига, кейин эса террор ва глобал беқарорликнинг янги сериясини бошлашига йўл қўймаймиз. Келишувдан кейин Россия қарши чиқадиган ‘Минск-3’ бўлмайди», — дея қўшимча қилди Украина раҳбари.

Маълумот учун, Индонезиянинг Бали оролида бугун, 15 ноябрь куни G20 (Катта йигирматалик) давлат раҳбарларининг йиллик саммити очилди. G20 таркибига Аргентина, Австралия, Бразилия, Буюк Британия, Германия, Ҳиндистон, Индонезия, Италия, Канада, Хитой, Мексика, Россия, Саудия Арабистони, АҚШ, Туркия, Франция, Жанубий Корея, Жанубий Африка, Япония ва Европа Иттифоқи киради. Саммитда G20 етакчиларидан ташқари, хусусан, Жаҳон соғлиқни сақлаш ташкилоти раҳбари Тедрос Адханом Гебрейесус, ФИФА президенти Жанни Инфантино, Иқтисодий ҳамкорлик ва тараққиёт ташкилоти бош котиби Маттиас Корманн ҳам иштирок этди.

G20 саммитида Аргентина президентининг соғлиғи ёмонлашди. Ҳиндистон бош вазири Нарендра Моди саммитда БМТ сайёрадаги хаос (тартибсизлик, алғов-далғовлик)ни эплай олмагани ва муаммоларни ҳал қила олмаганини таъкидлади.