Зеленский: «Украинага 80 дан ортиқ ракета ҳужуми уюштирилди»

^{Кадр: Telegram/@V_Zelenskiy_official}
Украина президенти Владимир Зеленский 15 ноябрь куни Киев шаҳри ва қатор вилоятларга берилган ракета зарбалари туфайли мамлакат аҳолисига мурожаат қилди. Тегишли мурожаат президентнинг ижтимоий тармоқлардаги саҳифасида эълон қилинди.

Зеленскийнинг сўзларига кўра, Украинага 80 дан ортиқ ракета учирилган бўлиб, уларнинг аксарияти энергетика инфратузилмасига зарба берган. Оқибатда бир қанча вилоятларда, шунингдек, Киевда ҳам электр таъминотида жиддий носозликлар юзага келди.

«Душман нимани хоҳлаётгани аниқ. У ўз мақсадига эриша олмайди», — дейди Украина раҳбари. У мамлакат бўйлаб яна 20 га яқин ракета ҳужумлари уюштирилиши мумкинлигини қўшимча қилди.

«Шунинг учун ўзингизни эҳтиёт қилишни ва бир муддат бошпаналарда қолишни илтимос қиламан. Ракета зарбалари кўплаб шаҳарларда электр энергияси узилишига сабаб бўлганини биламан. Таъминотни тиклаш устида ишлаяпмиз, буни енгиб ўтамиз», — дея таъкидлади у.

Зеленский мурожаатининг сўнгида «Украинага шон-шуҳрат» ва «Офарин» сўзлари билан якунлади.

Маълумот ўрнида, 15 ноябрь куни Киев ва Украина вилоятларига ракета зарбалари берилди. Оқибатда биноларда ёнғин чиқди, кўплаб вилоятлар электр таъминотидан узилди.

Ҳаво ҳужумидан мудофаа тизими минтақада бир нечта ракеталарни уриб туширди. Ракета зарбалари 4 соатдан кўпроқ давом этди. “Замин” янгиликларини “Telegram”да кузатиб боринг