Украинадаги урушда Россияда қамалган замбиялик талаба ҳалок бўлди

^{Фото: Getty Images}
Замбия ТИВ Украинадаги урушда ўз мамлакати фуқароси ҳалок бўлганини маълум қилди - у аввалроқ Россияда қамоқ жазосига ҳукм қилинганди. Бу Россияда Украинадаги ҳарбий ҳаракатлар учун жалб этилган хорижлик ўлими билан боғлиқ оммага маълум бўлаётган илк ҳолатдир.

Замбия ташқи ишлар вазирлиги маълумотига кўра, 23 ёшли талаба Лемехани Натан Ньиренда 22 сентябр куни Украинадаги «жанг майдонида» ҳалок бўлган. Унинг жасади аллақачон Ростовга олиб келинган ва тез орада Замбияга юборилади.

Замбия ТИВ у айнан қандай жиноят учун қамоққа ҳукм қилинганига аниқлик киритмаган, аммо у 2020 йил апрелида тўққиз ярим йил муддатга қамалганини хабар қилган.

Бунгача Ньиренда Москва муҳандислик-физика институтида (МИФИ) ядровий иншоотларни лойиҳалашни ўрганганди.

Замбия ТИВ раҳбари Стэнли Какубо Россия ҳукуматидан Москвада қамоқ жазосини ўтаётган замбиялик фуқаро Украинадаги урушга қандай жалб этилгани ва ҳалок бўлгани ҳақида зудлик билан маълумот беришни талаб қилган.

Россия ТИВ Замбия фуқароси ўлими билан боғлиқ текширилишини ваъда қилган. «Ҳозирда бу масалани кўриб чиқмоқдамиз. Лусакадаги элчихонамиз билан алоқа ўрнатдик, албатта, барча тафсилотларни аниқлаштирамиз», деган Россия ТИВ раҳбари ўринбосари Михаил Богданов.

Аввалроқ кўп сонли нашрларда «Вагнер» хусусий ҳарбий компанияси асосчиси Евгений Пригожин Россия қамоқхоналарида шахсан бўлиб, у ердаги маҳбусларни Украинада жанг қилишга тарғиб қилгани ҳақида хабарлар берганди.

Урушга жалб этилган россиялик маҳбуслар қаторида Евгений Нужин ҳам бўлган, бир неча кун олдин унинг шафқатсизларча қатл этилиши видеоси «Вагнер»га алоқадор бўлган телеграм-каналларда намойиш этилди. Нужин украиналикларга асир тушгач, Россияга қарши жанг қилмоқчи экани ҳақида айтганди. Аммо у ўз розилиги билан асирлар алмашинуви доирасида Россияга қайтган.

«Осторожно, новости» маълумотига кўра, Ньиренда МИФИда ядро физикасини ўрганган, 2020 йил августида Москванинг «Кусково» паркида мефедрон билан ушланган. Канал хабарига кўра, тергов ушбу талаба бу иш билан мунтазам шуғулланиб келганини аниқлаган.

Маълумотларга кўра, талаба Твер областидаги колонияга ўтказилган, у ерда эса Украинадаги урушга ёлланган. “Замин” янгиликларини “Telegram”да кузатиб боринг