Россия дронларининг ҳужумидан сўнг Одесса вилоятида 1,5 млн одам электрсиз қолди

^{Фото: Getty Images}
Россиянинг навбатдаги зарбаларидан кейин Одесса вилоятида 1,5 миллиондан ортиқ одам электр таъминотидан узилиб қолди, дея маълум қилди Украина президенти Владимир Зеленский. Маҳаллий ҳукумат аҳолини вилоятни тарк этишга чақирди ва электрни қайта тиклаш икки-уч ой давом этиши мумкинлигини билдирди.

«Тунги зарбалардан сўнг Одесса ва вилоятнинг бошқа шаҳар-қишлоқлари зулматда қолди. Айни пайтда Одесса вилоятида 1,5 миллиондан ортиқ одам электр энергиясидан маҳрум. Фақат ўта муҳим инфратузилма электрга уланган», — деди Зеленский 10 декабрь якунлари бўйича видеомурожаатида.

Президентнинг сўзларига кўра, Украинанинг энергетика тизими, «юмшоқ қилиб айтганда, нормал ҳолатдан анча йироқ» ва уни қайта тиклаш «жуда қийин». Электрни режали ўчириш графиклари Львов, Винница, Киев, Тернопил, Суми, Карпаторти, Житомир, Хмелницк вилоятларида ва Киев шаҳрида амал қилмоқда.

Украинанинг йирик энергетика компанияси ДТЕК Facebook’да Одесса вилояти электр таъминотидан деярли бутунлай узилганини хабар қилди. Одесса маъмуриятининг яшаш учун зарур тизимлар ва энергия самарадорлиги департаменти электрни қайта тиклаш уч ойгача давом этишини истисно қилмаяпти.

«Узоқ вақт электрсиз қолиш қанчалик қийинлигини тушунамиз. Агар яқин вақтда электрсиз қийин бўлишини тушунаётган бўлсангиз ва Одесса шаҳридан Одесса вилоятига ёки ундан ташқарига вақтинча кетиш имконига эга бўлсангиз, унда вазият шундай қилишга арзийди», — дейилади ҳукумат баёнотида.

Одесса 10 декабрь куни кечқурун энергетика объектларига Россиянинг камикадзе дронларидан зарбалар берилганини хабар қилди. Россия Мудофаа вазирлигининг 10 декабрь кунги ҳисоботида Одесса вилояти ёки Украинанинг энергетика инфратузилмасига берилган зарбалар тилга олинмади. Россия октябрь ойидан бери Украинадаги энергетика объектларига ҳужум қилмоқда. Бунинг оқибатида мамлакатда электр таъминотида узилишлар бошланган. “Замин” янгиликларини “Telegram”да кузатиб боринг