Чехия президенти Милош Земан мамлакат ҳукумати томонидан Украинага тақдим этилаётган кўмакни қўллаб-қувватлади ва унинг Россия етакчиси Владимир Путин ҳақидаги фикри бошида хато бўлганини тан олди. Бу ҳақда Radio CZ хабар бермоқда.
«Мени баъзилар Россия агенти деб атаса-да, менинг фикримча, биз [Украина билан] бирдам бўлишимиз керак… Мен унда [Путинда] ўз мамлакати манфаатлари учун ташвиш чекувчи сиёсатчини кўрардим. Лекин агрессия Россия Федерацияси манфаатларига зид эди», — деди Земан.
Украинада Россия ҳарбий операцияси бошланишидан аввалроқ Земан Россия билан муносабатларни йўлга қўйиш тарафдори бўлган ва Ғарбнинг санкциявий сиёсатини танқид қилган европалик сиёсатчилардан бири эди.
2017 йилда икки томонлама учрашув чоғида Чехия президенти узоқ вақт давомида Россияни Чехия пишлоғи ва йогуртидан маҳрум қилиши мумкин бўлган санкцияларга қарши бўлганини таъкидлаганди.
Шунга қарамай, 24 февралдаёқ Земан биринчилардан бўлиб Россияга қарши санкциялар киритишга чақирди. Мартда эса у Украина етакчиси Владимир Зеленскийни Чехия олий давлат мукофоти — Оқ шер ордени билан тақдирлади.
Октябрда Чехия президенти Евроиттифоқни Украинада ядро қуроли қўлланилган тақдирда, ҳарбий жавоб кўрсатишга чақирди. Унинг сўзларига кўра, «Россиянинг тактик ядро қуроли қўллаш ҳақидаги таҳдидлари» туфайли, ядровий низо хавфи ошиб кетган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
