10:10 / 15.12.2022

Польша сейми Россияни «терроризм ҳомийси» деб тан олди

^{Фото: «РИА Новости»}
Польша сейми (парламент қуйи палатаси) Россияни «терроризмни қўллаб-қувватловчи давлат» деб тан олинган резолюцияни қабул қилди, деб ёзмоқда Газета Wyborcza.

«Польша республикаси сейми Россия федерациясини терроризмни қўллаб-қувватловчи ва террорчилик воситаларидан фойдаланадиган давлат сифатида тан олади», — дейилади резолюцияда.

Ҳужжатда айтилишича, Россия «инсон ҳуқуқлари, халқаро ҳуқуқ, Бирлашган Миллатлар Ташкилоти низоми ва бир қатор бошқа мажбуриятларни тизимли равишда бузмоқда», шунингдек, «хусусан, энергетика соҳасида душманона иқтисодий ҳаракатлар қилмоқда».

Бундан ташқари, резолюцияда 2014 йилнинг июлида Malaysiaн Airlines авиакомпаниясининг MH17 рейси уриб туширилиши, шунингдек, 2010 йилнинг апрелида Смоленск яқинида 96 киши, шу жумладан, Польша президенти Лех Качинский ҳалок бўлган Ту-154 самолётининг қулаши учун Россия «бевосита жавобгар» экани қайд этилган.

Malaysia Airlines авиакомпаниясининг Амстердамдан Куала-Лумпурга йўл олган Boeing 777 самолёти 2014 йил 17 июль куни Донбассда ҳалокатга учраганди. Самолёт бортида 298 киши, шу жумладан 196 нидерландиялик бўлган. Йўловчилар ва экипаж аъзоларининг барчаси ҳалок бўлган.

Ту-154 самолёти 2010 йил 10 апрелда Смоленск яқинида ҳалокатга учраган. Самолётда Качинский ва унинг рафиқаси, шунингдек, сейм аъзолари, олий ҳарбий қўмондонлик, дин ва жамоат арбоблари бўлган. Делегация Катин қирғинининг 70 йиллиги муносабати билан мотам тадбирларига йўл олганди. Бортдаги 96 кишининг барчаси ҳалок бўлган. Варшава версиясига кўра, самолёт бортдаги портлашдан кейин ҳалокатга учраган.

Москва бу фалокатларга алоқадорлигини рад этиб келади.

Россияни терроризм ҳомийси деб тан олиш ҳақидаги биринчи резолюция 2022 йил 10 майда Литва сейми томонидан қабул қилинган эди. Кейин Латвия, Эстония, Нидерландия парламентлари, Чехия парламентининг қуйи палатаси ва Европа Кенгаши парламент ассамблеяси (PACE) томонидан худди шундай қарорлар қабул қилинди.