13:47 / 31.12.2022

Хитойнинг АҚШдаги собиқ элчиси ташқи ишлар вазири лавозимини эгаллади

^{Цин Ганг / Фото: Getty Images}
Хитойнинг АҚШдаги элчиси Цин Ганг Хитойнинг янги ташқи ишлар вазири бўлди, дея маълум қилди Хитой раҳбари Си Жинпинг. Бу ҳақда 30 декабрь, жума куни Reuters агентлиги хабар берди.

Цин Ганг ўзининг янги лавозимида сўнгги ўн йил давомида мамлакат ташқи ишлар вазири лавозимида ишлаб келган Ван Ининг ўрнини эгаллайди. Янги ташқи ишлар вазири Хитой ташқи сиёсатида муҳимроқ роль ўйнаши кутилмоқда ва ташқи ишлар вазирининг АҚШдаги собиқ элчисига ўзгариши Пекин ва Вашингтоннинг мураккаб муносабатларни барқарорлаштиришга уринишлари фонида содир бўлди, дея қайд этади Reuters.

Агентлик ёзишича, Цин Ганг АҚШдаги нисбатан қисқа хизмат муддати давомида АҚШ-Хитой муносабатларига оптимистик нуқтайи назар билан қараган бўлса-да, унинг фаолияти икки давлат ўртасидаги муносабатларнинг ёмонлашувига тўғри келди.

2005—2010 йилларда Цин Ганг Хитой Ташқи ишлар вазирлигининг расмий вакили, бир йилдан сўнг Буюк Британиядаги элчи, 2011 йилдан эса мамлакат Ташқи ишлар вазирлигида турли лавозимларда ишлаган, 2018 йилда ташқи ишлар вазири ўринбосари бўлган.

Цин Ганг ташқи ишлар вазири этиб тайинланишидан бир неча кун олдин Американинг The National Interest журналида мақола эълон қилди, унда бошқа нарсалар қаторида Украинадаги уруш ҳақида ҳам эслатиб ўтди.

"Хитой Украинадаги вазиятдан жуда хавотирда. Гарчи бу жуда қайғули бўлса-да, у ерда содир бўлаётган воқеалар муҳим сабоқ беради: можаролар ва урушларда ғолиблар йўқ, мураккаб масалалар осон ечим топмайди, йирик давлатлар ўртасидаги қарама-қаршиликдан қочиш керак", деб ёзган у.

Янги ташқи ишлар вазири Украинадаги уруш шароитида "ҳозирги энг долзарб вазифа" - Россия ва Украина ўртасидаги тинчлик музокараларини, шунингдек, АҚШ, Европа Иттифоқи, НАТО ва Россия ўртасидаги мулоқотни ривожлантириш эканини таъкидлади. "Узоқ муддатда одамлар ўз хавфсизлигини бошқа мамлакатларнинг ишончсизлигига асослаш иш бермаслигини тушунишлари керак; мувозанатли, самарали ва барқарор Европа хавфсизлик тузилмасини яратиш керак. Бундан бошқа танлов йўқ", - дея таъкидлади Цин Ганг.