Бразилия президенти инаугурациясида портловчи қурилма ва пичоқ билан қуролланган эркак қўлга олинди

^{Фото: Getty Images}
Бразилияда полиция портловчи қурилма ва пичоқ билан президент Луис Инасиу да Сильванинг инаугурация маросимига кириб олмоқчи бўлган шахсни қўлга олди. Бу ҳақда Reuters мамлакат ҳарбий полицияси вакилига таяниб хабар берди.

Унинг сўзларига кўра, эркак киши 1 январь, якшанба куни пойтахт Бразилияда таклиф қилинган меҳмонлар ва томошабинлар жам бўлган, инаугурация маросими ўтказилаётган майдонга кирмоқчи бўлган. Полиция тафсилотларни ошкор қилгани йўқ, аммо ушбу шахс Рио-де-Жанейродан келгани, ошпичоқ ва «пиротехника ускунаси»ни олиб ўтмоқчи бўлгани маълум.

Бразилия собиқ президенти Лула да Сильва октябрь охирида бўлиб ўтган сайловларнинг иккинчи босқичида амалдаги давлат раҳбари Жаир Болсонаруни мағлуб этган эди.

Сайловдан кейин мамлакатда Жаир Болсонару тарафдорлари иштирокида тартибсизликлар бўлиб ўтди.

Болсонару 2018 йил кузида биринчи марта президент этиб сайланган, 2019 йил январида эса лавозимига киришган эди. У ўзининг ўта ўнг ва популистик қарашлари, Бразилия ҳарбий диктатурасига мойиллиги ҳамда феминизм ва ЛГБТ-ҳамжамиятларига қарши нутқлари билан танилган. Россия Украинада махсус операция бошлагач, у Бразилия бетарафлик позициясини эгаллашини ва Москвага қарши санкциялар киритмаслигини маълум қилди.

2016 йилда Лула Petrobras давлат нефть компаниясида коррупция ва пул ювиш ҳақидаги иш бўйича 12 йилга ҳукм қилинган эди. Бу воқеа атрофидаги можаро натижасида 2016 йилда Дилма Руссефга нисбатан ҳам импичмент эълон қилинди. У Луланинг президент лавозимидаги давомчиси ва Ишчилар партияси бўйича маслакдоши эди. Собиқ президентнинг ўзи, апелляция ҳуқуқидан фойдаланиб, озодликда юрган, 2021 йилда эса Бразилия Олий суди унга нисбатан ҳукмларни бекор қилган. “Замин” янгиликларини “Telegram”да кузатиб боринг