Леонид Крикун
Петербурглик таниқли адвокат «эркинликдан маҳрум қилиш шароитида ирода кучини синаб кўришни ва режимнинг ишлашига пассив бўлса ҳам ҳисса қўшишни» истамаслигини айтди.
Петербурглик таниқли адвокат ва ҳуқуқшунос Леонид Крикун Россияни тарк этди. SOTA агентлигининг 4 январь, чоршанба куни маълум қилишича, Крикун таъқиблардан қўрқиб, мамлакатни тарк этган.
Унинг таъкидлашича, «эркинликдан маҳрум қилиш шароитида иродани синаб кўришни ва режимнинг ишлашига пассив бўлса ҳам ҳисса қўшишни» истамайди. Крикуннинг сўзларига кўра, у янги жойда ҳеч қандай манбага эга эмас, шунга қарамай, хиёнат ва қўрқоқлик қаерда, жасорат ва қаҳрамонлик қаерда эканлигини ўзи учун аниқлаштириб олган.
«Мен «режим душманлари»га юридик ёрдам кўрсатишни давом эттиришга қарор қилдим, аммо энди буни масофадан туриб амалга ошираман», — деди адвокат «Север.Реалии» нашрига берган интервьюсида.
Крикун ўз позициясини ошкора ифода этган бир қатор фаоллар ва жамоат арбобларига қарши жиноий суд жараёнларида иштирок этгани билан танилган. У фаол Сергей Мохнаткин, Навалнийнинг Архангелск штаби собиқ координатори Андрей Боровиков, «Свобода» журналисти Татяна Вольтская, иеромонах Иоаннинг (Курмояров) «армия ҳақидаги фейклар» бўйича ишида ҳимоячи бўлган. Адвокат фаоллар ва жамоат арбобларига нисбатан қўзғатилаётган ишлар сиёсий сабабларга кўра, адолат қуроли эмас, балки фуқаролар норозилигини бостириш воситаси бўлиб хизмат қилишини бир неча бор таъкидлаган.
Россия Федерациясининг Украинада ҳарбий ҳаракатлари бошланганидан сўнг, судда фуқаролик жамияти вакилларини ҳимоя қилган кўплаб адвокатлар Россияни тарк этишди, жумладан Иван Павлов, Евгений Смирнов, Иля Новиков. Таниқли ҳуқуқшунослар Генри Резник, Вадим Клювгант ва Константин Добринин Федерал адвокатлар палатаси кенгашидан чиқиб кетди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
