Россиянинг “маданий пойтахти” деб ном олган Санкт-Петербургда янги йилнинг илк чақалоғи тува миллатига мансуб бола бўлди. Бу хабар интернетда тарқалганидан сўнг миллатчилар “генофондни асраш ва славянларнинг камайиб кетаётгани”дан васвасага тушиб, ижтимоий тармоқ ирқчилик ва миллатчилик руҳидаги изоҳларга тўлиб кетди.
Шуни ҳам айтиб ўтиш керакки, Тува чет эл эмас, Россия Федерациясининг бир субъекти, туваликлар ҳам худди руслардек Россия фуқароси ҳисобланишади.
“Питер сегодня” нашрида берилган хабарга берилган изоҳларда россияликлар чақалоқ ва унинг онасига нисбатан ҳақорат ва нафрат ёғдиришга ўтишди. Улар туваликларни ҳар томонлама ҳақорат қилиб уларни «тараша», «буғу боқувчилар» ва «кўзлари қисиқ» деб аташган.
Мана россияликлар, аниқроқ айтадиган бўлсак, давлатни ташкил этувчи миллат вакиллари ёзган айрим шарҳлар:
«Жин урсин. Шаҳарнинг биринчи туғилган боласи тувалик. Даҳшат».
«Тувага яқинроқ бошқа туғруқхона йўқ эканми?!».
«Бунақада бутун Осиё Санкт-Петербургга кўчиб келади».
«Генофонд биринчи ўринда туради. Совет Иттифоқи бу кичик халқларни ювинишга қанча вақт ўргатган. Энди булар славянларнинг ҳақиқий ўрнини олиб қўйяпти».
«Давлатга уят! Кўк кўзли болаларнинг туғилиши тўхтаб қолди».
“Салом, бўлажак такси ҳайдовчиси”.
“Ачинарлиси, шаҳримиздаги болалар майдончаларида кўзлари қисиқ болаларгина қолган”.
«Мен шунчаки “чурка”ларни ёқтирмайман».
«Суратда рус бақалоқ болани кўришни хоҳлайман, мана буларни эмас!».
Эслатиб ўтамиз, Россия Украинага қарши урушга асосан ўзининг кичик халқлари вакилларини юбормоқда. Урушда ўлаётган кичик халқларнинг сони рус миллатига мансуб ҳалок бўлганлардан анча кўп. 2022 йил сентябрь ҳолатига кўра, ҳалок бўлган россияликларнинг 40% дан сал камроғи славян бўлмаган этник гуруҳлар вакиллари бўлган.
Россиялик журналист Александр Невзоров шундай ёзади: “Путинизм кучайиб бормоқда. Бу СССРда «етти қулф» остида бўлган ва қаттиқ таъқибга учраган ўша рус миллатчилиги учун ажойиб иссиқхонага айланди. 90-йилларда, озодлик йилларида бундай сўзлар умуман ақлга сиғмас эди. Эҳтимол, бундай ўйлар энг шафқатсиз миллатчиларнинг калласида яшаган бўлиши мумкин, лекин уялиб, уларни яшириш одат эди. Путинизм халқнинг энг қабиҳ нарсасига таяниб, рус ирқчилигига мутлақ эркинлик берди. Ўзингиз кўриб турганингиздек, «Питер сегодня» нашридаги изоҳлар ирқчилик куч, овоз, эксклюзив ҳуқуқ ва имкониятларга эга эканлиги маълум бўлди.
Мен сизни ҳафсалангизни пир қиламан: ирқчиликни орқага суриш диктатор ўлимидан кейин ҳам иш бермайди. Бу ахлатни йўқ қилиш, уни «қафас»ига қайтариш учун йигирма йиллик машаққатли ва ақлли меҳнат керак бўлади, бунинг учун замонавий Россиянинг на кучи ва на имкони бор.
P.S. Сизга шуни эслатиб ўтаманки, мақолага ёзилган изоҳлар урушдан олдин Россияда энг маданиятли ва «европалашган» ҳисобланган шаҳар аҳолиси томонидан яратилган”.
Ўзбекистонлик жамоат арбоби, иқтисодчи Юлий Юсупов ҳам бу воқеага муносабатини билдириб шундай дейди: "Замонавий ирқчилик нима дегани?
Бу тувалик аёл Санкт-Петербургда туғишга журъат этгани учун ҳақоратлар остида қолди. Ахир «чурка» аёлнинг Россиянинг «маданий пойтахти»да бола туғишига бало борми?!
Аксарият аҳолиси ирқчилар, сталинчилар ва путинпарастлар бўлган мамлакат кимни “денацификация” қилмоқчи? Бандера ёқмаяпти, дейсизми?”.
Манба: Azon.uz
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
