12:00 / 24.01.2023

Навалнийни қўллаб-қувватловчи адвокатлар хати Путинга юборилди

^{Фото: Vladimir Kondrashov/AP/picture alliance}
Колонияда узоқ муддат қамоқ жазосини ўтаётган россиялик мухолифатчи Алексей Навалнийни қўллаб-қувватловчи адвокатларнинг очиқ хати шахсан Россия президенти Владимир Путинга юборилди. Бу ҳақда 23 январь, душанба куни DW'га мурожаат ташаббускори, петербурглик адвокат Виктор Дроздов хабар берди.

Хатни 103 нафар адвокат, жумладан Иван Павлов ва Каринна Москаленко имзолаган. Имзолар ва жўнатиш квитанцияси билан аризанинг нусхаси DW ихтиёрига келиб тушган.

"Биз - адвокатлар, фуқаролик жамияти вакиллари, Россия Федерацияси фуқароларимиз. Бизнинг тўғридан тўғри бурчимиз фуқароларнинг ҳуқуқлари ва қонуний манфаатларини Россия Федерацияси қонунчилиги билан тақиқланмаган барча воситалар орқали ҳалол, оқилона ва виждонан ҳимоя қилишдир", - дея маълум қилди мактуб муаллифлари. Уларнинг сўзларига кўра, ҳуқуқий мақомидан маҳрум этилган ҳамкасби Алексей Навалнийнинг "конституциявий ҳуқуқлари поймол этилиши ва инсон қадр-қимматининг камситилишига хотиржам қараб ўтиришнинг иложи йўқ".

Адвокатларнинг таъкидлашича, унинг Владимир вилоятидаги колонияда ҳибсдаги шароитлари "соғлиғига зарар етказиш билан боғлиқ ва ҳаётга хавф туғдиради". "Ҳуқуқий нуқтайи назардан, жамият унга нисбатан қийноқ қўллашнинг барча белгиларига эга бўлган, дунёнинг барча цивилизациялашган мамлакатларида тақиқланган Россия Федерацияси фуқаросига нисбатан давлатнинг хатти-ҳаракатига гувоҳ бўлди", дея таъкидланади хатда. Мактуб муаллифлари таъкидлаганидек, улар тўғридан тўғри Путинга мурожаат қилишга мажбур, чунки Россиядаги барча ҳокимият унинг қўлида тўпланган.

Адвокатларнинг Навалнийни ҳимоя қилган очиқ хати 14 январь куни оммага эълон қилинди. Унинг ташаббускори Виктор Дроздовнинг DW нашрига берган интервьюсида айтишича, ҳуқуқ ҳамжамияти бунга аввалроқ худди шундай мурожаатни эълон қилган шифокорларнинг бирдамлик акциясидан кейин қарор қилган. "Шифокорларнинг Навалнийни қўллаб-қувватлаб, инсон саломатлиги, касбининг обрў-эътибори учун қайғураётгани, албатта, бизга таъсир кўрсатди. Ахир, Алексей Навалний адвокат бўлган, сиёсий фаолияти фонида унга нисбатан жиноий иш қўзғатилганидан сўнг у бу мақомдан маҳрум қилинган эди", — дея тушунтирди у.