Россия Украинанинг босиб олинган ерларида қамоқхоналар ташкил қилмоқчи

Россия ҳукумати Украинанинг Донецк, Луганск, Херсон ва Запорожье вилоятларининг босиб олинган ҳудудларида 24 та ахлоқ тузатиш колониялари ташкил этиш ниятида, дейилади ҳуқуқий ахборот расмий порталида эълон қилинган фармонда.

Ҳужжат Россия томонидан ном берилган ДХРда 12 та, ЛХРда 7 та, Херсон вилоятининг босиб олинган қисмида 3 таси ва Запорожьенинг босиб олинган қисмида 2 та колония ташкил этишни назарда тутади.

Аннексия қилинган ҳудудларда Россия ҳукумати тиббий ва ахлоқ тузатиш муассасалари ва ахлоқ тузатиш марказларини ташкил этишга қарор қилди. Ҳукумат, шунингдек, Федерал жазони ижро этиш хизматига уч ой ичида янги муассасаларни рўйхатдан ўтказишни топширди.

Ўтган йилнинг октябрь ойи бошида Россия президенти Владимир Путин Россия қўшинлари томонидан босиб олинган ДХР, ЛХР, Херсон ва Запорожье вилоятлари деб аталадиган ҳудудларни “Россия Федерацияси таркибига қабул қилиш” тўғрисидаги битимни ратификация қилишни маъқуллаган эди.

Путин, шунингдек, босиб олинган Украина ҳудудларини Россия Федерацияси таркибига қўшиб олиш ва янги субъектларни шакллантириш тўғрисидаги қонунларни имзолаган. Ушбу қонунлар асосида Россия Конституциясига ўзгартиришлар киритилади. Унга субъектлар сифатида Украинанинг Херсон, Запорожье, Луганск ва Донецк вилоятлари қўшилади.

Қонунларга кўра, Украинанинг босиб олинган вилоятлари аҳолиси жорий йилнинг 30 сентябрдан бошлаб Россия фуқароси деб тан олинади. Тўлиқ фуқароликка ўтиш даври 2026 йил 1 январгача кўзда тутилган. Ҳужжатларга кўра, қўшиб олинган ҳудудларда сайловлар 2023 йил 10 сентябрда ўтказилади.

Шу билан бирга, Москва ўзи аннексия қилган Украина вилоятларининг бирортасини тўлиқ назорат қилмайди. Запорожье вилоятининг муҳим қисмлари (шу жумладан унинг маркази Запорожье шаҳри) ва Донецк вилояти, шунингдек, Херсон ва Луганск вилоятларининг кичик қисмлари Украина назорати остида қолмоқда.

Дунёнинг кўплаб давлатлари аннексияни тан олмаслигини билдирган. Украина ҳам аввал ўз назорати остида бўлган ва сўнгра Россия томонидан босиб олинган ҳудудларни жанг орқали қайтариб олишни даъво қилмоқда. «Замин»ни Telegram’да ўқинг!