АҚШ Украинага янги ҳарбий ёрдам пакетини эълон қилишга тайёрланяпти

^{Фото: NBC}
Америка Қўшма Штатлари Украинага янги ҳарбий ёрдам пакетини эълон қилишга тайёрланмоқда, деб хабар берди Оқ уй матбуот котибининг биринчи ўринбосари Оливия Далтон.

У АҚШ президенти Жо Байденнинг Киевга F-16 қирувчи самолётларини етказиб беришдан бош тортгани ҳақида изоҳ беришни рад этди, бироқ Вашингтон Украинага катта миқдордаги қурол-яроғлар, жумладан, артиллерия ўқ-дорилари, зирҳли техникалар ва ҳаво ҳужумидан мудофаа воситаларини ўтказаётганини таъкидлади.

Президент Жо Байден 30 январь, душанба куни журналистларнинг Қўшма Штатлар Украинага F-16 қирувчи самолётларини етказиб бермоқчими ёки йўқлиги ҳақидаги саволига салбий жавоб берди. «Йўқ», - дея унинг жавобини келтирди AFP агентлиги.

26 январь куни Байденнинг хавфсизлик бўйича маслаҳатчиси Жон Файнер MSNBC телеканалининг Киевга F-16 қирувчи самолётларини топшириш масаласи кўриб чиқилмоқдами ёки йўқлиги ҳақидаги саволига жавоб берар экан, Вашингтон «буни истисно этмаслигини» айтди.

Ўша куни Пентагон матбуот котиби Сабрина Сингх журналистларга бундай етказиб бериш масаласи «кун тартибидан олиб ташланмаслигини» тасдиқлади ва украиналик учувчилар F-16'дан фойдаланиш учун узоқ тайёргарликдан ўтишлари кераклигини таъкидлади.

Янгиликлар