14:30 / 04.02.2023

Экспертлар: Россия Украинада янги йирик ҳужумга тайёрланяпти

^{Фото: Reuters}
Россия Украинада янги йирик ҳужумга тайёрланмоқда, уни яқин келажакда кутиш мумкин. Бу ҳақда 3 февраль, жума куни «Новая газета. Европа» ўзи суҳбатлашган экспертлар, шунингдек, Россия қўшинлари гуруҳининг Украинадаги штабида бўлган манбага таяниб хабар берди. Унинг сўзларига кўра, генераллар олий ҳарбий-сиёсий раҳбариятнинг инжиқлигини қондириш учун «ўн минглаб россиялик ҳарбий хизматчиларни ишга солишга» тайёр.

Янги ҳужумнинг ҳеч қандай аниқ хавфи ҳисобга олинмаяпти, деди манба. «Украиналиклар бизнинг барча ҳаракатларимиз ҳақида Ғарб разведка идораларидан мутлақо аниқ маълумотларни олишади», деди у. Бундай шароитда, дея таъкидлади штаб зобити, «маълум бир ҳудудда HIMARS ва узоқ масофали артиллерия зарбаларига таъсир қилмасдан туриб, етарли миқдордаги кучларни тўплаш мумкин эмас».

Манбага кўра, бўлажак ҳужумнинг яна бир муаммоси нафақат янги ҳудудлар ва шаҳарларни эгаллаш қийинчиликлари, балки уларни кейинчалик сақлаб қолиш билан ҳам боғлиқ. Ҳужум пайтида фронтнинг муқаррар равишда чўзилиши билан ўқ-дорилар ва ҳатто озиқ-овқат етказиб беришда қийинчиликлар пайдо бўлади. «Ҳужумлар натижасида аҳоли пунктлари ўрнига биздан нафратланган аҳоли ва уй харобалари манзарасига эга бўламиз. Босиб олинган ҳудудларда душманнинг қўпорувчилик ва разведка гуруҳлари ҳаракат қилмоқда. Катта йўқотишлар эвазига», - деди Россия ҳарбийлари.

«Новая Газета. Европа» суҳбатдоши на операция бошланиш вақтини, на Россия қайси йўналишда ҳужум қилмоқчи эканлигини аниқлаштирмади. Нашр суҳбатлашган экспертларнинг фикрича, рус қўшинлари фронт чизиғини Донбасс ва Қримнинг аннексия қилинган қисмидан узоқлаштиришга, Запорижжя вилоятида ёки Беларус ҳудудидан Волин томон ҳужум уюштиришга уриниши мумкин.

Украиналик ҳарбий эксперт Роман Свитаннинг фикрича, Россияда 23 февралда нишонланадиган Ватан ҳимоячилари куни муносабати билан Россия армияси бир қанча аҳоли пунктларини – Угледар, Авдийивка, Маринка ёки Бахмутни эгаллаб олишга уриниб, ўн минглаб ўз ҳарбийларнинг ҳаётига зомин бўлиши мумкин. «Бу олий бош қўмондонга совға қилиш учун керак», деди Свитан. Унинг сўзларига кўра, «Россия армияси об-ҳаво шароити ва ландшафт хусусиятларига эмас, балки саналар ва аҳоли пунктларига таянган ҳолда жанг қилмоқда». Мисол учун, руслар Соледарни фақат ўз аскарларининг жасадларини у ерда тўлдириб ташлаш орқали эгаллашга муваффақ бўлишди. «Бу раҳбариятга ҳеч бўлмаганда қандайдир ғалабани тақдим этиш учун қилинган», - дейди эксперт.

Роман Свитаннинг фикрича, Украина Қуролли кучлари нафақат Россия ҳужумини қайтаришга, балки муваффақиятли қарши ҳужумни бошлашга қодир. Бунинг учун кучлар, унинг баҳосига кўра, етарли бўлиши керак. Ленд-лиз дастури бўйича Украинага оғир техника - танклар, пиёдалар жанговар машиналари, артиллерия ва кўплаб ракета тизимлари кириб келаётганида, Киев Азов денгизи қирғоқлари томон ҳужум операцияларини бошлаши мумкин бўлади. Бу бир вақтнинг ўзида иккита рус фронти - Запорижжя ва Херсонни йўқ қилишга олиб келиши мумкин, дейди эксперт.