Франция ва Италия Украинага SAMP-T зенит-ракета комплексларини юборади

^{Фото: Getty Images}
Баҳорда Франция ва Италия Украинага SAMP-T-Mamba русумли зенит-ракета комплексларини жўнатади. Бу ҳақда Франция қуролли кучлари вазири Себастьен Лекорню твиттери орқали эълон қилган.

Лекорнюнинг сўзларига кўра, Италия мудофаа вазири Гвидо Крозетто билан Украина тинч аҳолиси ва инфратузилмаларини ҳимоялаш учун мудофаа тизимлари етказиб бериш бўйича келишиб олинган. Вазир ушбу мамлакатлардан Украинага етказиб бериладиган қуроллар сонига аниқлик киритмаган.

SAMP-T-Mamba — ўрта масофадаги баллистик ва қанотли ракеталар, шунингдек 100 километргача масофадаги самолётларни уриб тушириш учун мўлжалланган, қуруқликдаги зенит-ракета комплекси ҳисобланади.

Сентябр ойи охирида Украина АҚШдан Америка-Норвегия маҳсулоти бўлган NASAMS русумли ҳаво ҳужумидан мудофаа тизимларини қабул қилиб олганди. Бу тизимлар 40–50 километр радиусда ва 15 километр атрофидаги баландликдаги нишонларни аниқлаб, зарба беради. Бу тизимлар ҳам қанотли ва баллистик ракеталар, дронлар ва самолётларни уриб туширишга қодир.

Октябр ойида эса Германия Украинага Iris-T SLM русумли ҳаво ҳужумидан мудофаа тизимларининг биринчисини етказиб берди. Iris-T SLM зенит-ракета комплекси учта машинадан иборат бўлади: ҳарбий юк машинасидаги учириш қурилмаси, радиолокация машинаси ва бошқарув машинаси. Бу тизим ракеталари 20 километр баландликдаги ва 40 километргача бўлган узоқликдаги нишонларга етиб боради.

Янгиликлар