Фото: AP
Агар Ғарб давлатлари сўралган қирувчи самолётларни зудлик билан Киевга топширишга қарор қилса, Украина бу йил Россия билан урушда тўлиқ ғалаба қозониши мумкин. Бундай фикрни АҚШнинг Европадаги қўшинлари собиқ қўмондони, истеъфодаги генерал-лейтенант Бен Ходжес билдирди.
«Агар биз ушбу даражадаги қўллаб-қувватлашни сақлаб қолишда давом этсак, Украина албатта ғалаба қозонади, бунга ҳеч қандай шубҳа йўқ. Лекин бу беш йилгача вақт олиши мумкин, бу вақт ичида кўплаб бегуноҳ одамлар ҳалок бўлади. Қанчалик тезроқ уларга ҳал қилувчи натижага эришиш имконияти берилса, ҳамма нарса шунча тезроқ тугайди. Бу уруш шу йил якунланиши мумкинлигига ишонаман. Украина Россияни мағлуб этиб, Қрим ва Донбассни тарк этишга мажбур қилиши мумкин. Бу қачонгача давом этиши бизга боғлиқ», деди Ходжес 10 февраль, жума куни DW нашрига берган интервьюсида.
Унинг сўзларига кўра, украиналик учувчиларни Ғарб қирувчиларини бошқаришга ўргатиш билан боғлиқ қийинчиликлар Киевни самолётлар билан таъминлашнинг иложи йўқлигини англатмайди. «Украина, албатта, энг яхши учувчиларни танлаб, уларни янги қирувчиларга ўтказади. Улар университетларга нолдан ўқишга юборилади дегани эмас», - дея тушунтирди генерал ва бу жараённи тезроқ бошлашга чақирди.
Бен Ходжеснинг сўзларига кўра, қирувчи самолётларни етказиб бериш аслида HIMARS тизимлари ёки Panzerhaubitze 2000 гаубицаларини Киевга топширишдан фарқ қилмайди. Буларнинг барчаси Қуролли кучларга Россия базалари, логистика ва ҳарбий техникасига ҳужум қилиш имкониятини берадиган узоқ масофали аниқ қуроллардир, деди у.
Ходжеснинг айтишича, ҳарбий ёрдам бўйича АҚШ ва унинг иттифоқчилари кесиб ўтмайдиган ягона «қизил чизиқ» бу ҳарбий хизматчиларни жанг майдонидаги урушда бевосита иштирок этиш учун юборишдир. «Аммо украиналиклар буни сўрамайдилар, уларга керак эмас», - деди америкалик генерал.
Қрим устидан назорат Украинага қайтарилмасдан туриб, тўлиқ ғалаба ҳақида гапиришнинг иложи йўқ, деди Бен Ходжес. «Уларнинг суверен ҳудудларини тўлиқ тиклаш. Россия Қримда қолар экан, у ҳужумни қайта бошлаш учун биз кетишимизни кутиб туради», - дея огоҳлантирди у.
Россия ҳужуми гўёки тайёрланаётгани ҳақида гапирар экан, Ходжес рус қўшинлари «катта» ҳужумни бошлаш қобилиятига эга эканлигига шубҳа қилди. «Уларнинг зирҳли техникаси йўқ, ёриб ўтиш қобилияти ҳам йўқ», деди генерал ва кичик бир олға силжиш Украинадаги «умумий операцион муҳит»ни ўзгартирмаслигини қўшимча қилди. Киев, унинг фикрича, Россия муваффақиятини чеклаш учун етарли ресурсларга эга, аммо бу йўқотишлар нуқтайи назаридан қимматга тушади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
