Фото: Getty Images
Туркия жануби-шарқида 6 феврал кунги зилзила оқибатида ҳалок бўлганларни қидириш ишлари давом этмоқда. Сўнгги маълумотларга кўра, Туркиянинг табиий офатдан жабрланган 10 вилоятида ҳалок бўлганлар сони 40 минг 642 нафарни ташкил этмоқда. Қўшни Сурияда эса 5,8 минг киши ўлими рўйхатга олинган, аммо бу ерда бир неча кундан буён ўлим ҳолатлари сони янгиланмаяпти - бу эса фожианинг ҳақиқий кўлами ҳали номаълум бўлиб қолаётганини кўрсатади.
Туркияда ҳам қурбонлар сони ошиши ўсишда давом этиши кутилмоқда, мамлакатда 345 минг квартира вайрон бўлган ва кўплаб одамлар ҳамон бедарак йўқолган деб ҳисобланмоқда.
Туркия қутқарув хизмати AFAD раҳбари Юнус Сезер ер силкинишлари эпимарказига энг яқин шаҳар бўлган Қаҳрамонмарашда қутқарув ишлари якунланиш арафасида эканини маълум қилди. «Қаҳрамонмарашда яна 19 бино қолди ва Адимаяндаги Чинор объектида ишлар давом эттирилмоқда. Қидирув-қутқарув ишлари эртага кечга бориб якунланиб қолади», деган у.
Пайшанба куни 6 феврал кунги зилзиладан жиддий зарар кўрган Туркиянинг Ҳатай вилоятида 5,1 магнитудали яна бир зилзила рўй берди. Шанба куни Ҳатай губернатори Раҳми Дўған вилоятдаги бино харобаларини тозалаш ишлари 19 феврал куни бошланишини айтди.
Ҳатайда сўнгги зилзила оқибатида ҳалок бўлганлар сони аниқ эмас. BBC турк хизматига кўра, мамлакатда зилзила оқибатида жароҳат олганлар сони 100 мингдан ошади.
Туркия соғлиқни сақлаш вазири Фахриддин Хўжа тиббий ёрдам сўраб мурожаат қилганлар сони бундан анча кўпроқ эканини айтди. Унинг маълумотига кўра, табиий офатдан жабрланган ҳудудларда 12 кун ичида дастлабки тиббий кўрикдан ўтказилганлар сони 962 минг кишини ташкил этган. БМТ эса зилзиладан жабрланганларнинг жами сонини 5,2 млн кишига баҳолаган.
Хўжа 6 мингдан ортиқ жабрланган киши ҳамон шифохоналарда қолаётганини хабар қилган. 13 мингдан ортиқ кишига жавоб берилган.
Жабрланганларга ёрдам ва айбдорларни қидириш
Туркияда қидирув-қутқарув ишлари 6 февралдан буён тўхтамади. Туркия вице-президенти Фуат Ўқтой жума куни зилзиладан жабрланган вилоятларда қутқарувчилар ҳали ишни давом эттираётган 200 минг бино қолганини айтди - табиий офат ҳудудида жами 830 мингдан ортиқ бино шикастланган, шундан 105 мингтаси вайрон бўлган.
14 феврал куни вазирлар маҳкамаси йиғилишидан кейин чиқиш қилган Туркия президенти Ражаб Тоййиб Эрдўған зилзила оқибатида вайрон бўлган биноларнинг 98 фоизи 1999 йилга қадар қурилган бинолар эканини айтди.
Шу билан бирга, табиий офат оқибатида анча замонавий бинолар шикастланганига ҳам далиллар бор.
Эрдўған зилзиладан омон қолган 890 минг киши жамоат ётоқхоналарига, яна 50 минг киши - меҳмонхоналарга жойлаштирилгани, жами 1,6 млн киши зилзиладан кейин вақтинча турар жойлар билан таъминлангани ҳақида айтди.
AFAD қутқарув хизмати 16 феврал куни Туркиядаги ва халқаро ташкилотлар табиий офатдан жабрланган ҳудудларга 387 мингга яқин палатка юборгани, шундан 172 265 мингтаси жойлари ўрнатилгани ҳақида маълум қилди. Ҳудудларга 3 млн адёл ҳам етказиб берилган.
Аммо 17 феврал куни қочқинларга ёрдам гуруҳи палаткалар, адёллар, тозалаш воситалари ва егулик юборишни сўрашда давом этди. AFAD маълумотига кўра, региондан 216 347 киши эвакуация қилинган.
Бу вақтда эса Туркия адлия вазирлиги расмийлар фикрига кўра бинолар зилзилага дош бера олмагани учун айбдор бўлганларни ҳибсга олишда давом этмоқда.
Ҳафта бошида Туркия ҳукумати гумонланувчиларни ҳибсга олиш учун камида 113 ордер бергани маълум бўлганди, улар одамлар қурбон бўлишида жавобгар деб ҳисобланган. Кейинроқ адлия вазири Бекир Бўздоғ бинолар вайрон бўлишида айбдор экани гумонланаётган 134 кишига тегишли чоралар қўллангани ҳақида хабар қилди.
Шанба куни Туркия адлия вазирлиги 10 та вилоятда прокурорларга «зилзила билан боғлиқ жиноятларни тергов қилиш бўйича бўлимлар» ташкил этишга кўрсатма бергани маълум бўлди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
