Шольц: Путин ўз мақсадига эриша олмаслигини тан олса, урушни тезроқ тугатиш имкони шунчалик кўп бўлади

^{Фото: EPA}

Германия қатъий равишда Украина томонида. Бу ҳақда Германия канцлери Олаф Шольц уруш бошланганининг бир йиллиги муносабати билан қилган мурожаатида айтиб ўтди.

«Мана бир йилдирки, Россия Украинага қарши шафқатсиз босқинчилик уруши олиб бормоқда. Германия Украина томонида қатъий турибди ва келажакда ҳам шундай бўлади», - деди Шольц.

Россия президенти Владимир Путин «ўз империалистик мақсадига эриша олмаслигини тан олса, урушни тезроқ тугатиш имконияти шунчалик кўп бўлади», дея қўшимча қилди Германия вазирлар маҳкамаси раҳбари.

Германия канцлери Олаф Шольцнинг фикрича, Россиянинг Украинага қарши урушини тўхтатиш бўйича музокаралар вақти ҳали келмаган. «Тинчлик истиқболини очадиган пайт ҳали олдинда», деди у 23 февраль, пайшанба куни Германиянинг ZDF телеканалига берган интервьюсида.

«Музокараларни ҳозир бошлаш керак, дейиш ҳеч нарсага олиб келмайди. Шуни тушуниш керакки, Россия президенти ҳозирда музокараларнинг фақат битта шаклига рухсат беради, яъни кимдир сўзсиз таслим бўлади ва у ўзининг барча мақсадларига эришади», - деб тушунтирди Шольц.

Шухрат Раззаков

«ЗАМИН.УЗ» муҳаррири